سابق صدر آصف زرداری بھی ماموں بن گئے

نوشہرو فیروز(ویب ڈیسک) انتظامیہ نے سابق صدر آصف زرداری کو بھی ماموں بنا دیا ، نوشہرو فیروز آمد پر سبزہ دکھانے کیلئے مصنوعی درخت لگا دیے جن کا پول کھل گیا۔سابق صدر آصف علی زرداری گزشتہ روز ایک تقریب میں شرکت کیلئے نوشہرو فیروز پہنچے تو انتظامیہ نے ان کی آمد کے سلسلے میں شاہراہوں پر ہرے بھرے درخت دکھانے کیلئے مصنوعی شجر کاری کر دی۔ انتظایہ نے سڑک کے دونوں جانب مرجھائے ہوئے درخت اورپودے لگا دیے جنہیں کسی جگہ تو کھمبوں کا سہارا دیا گیا اور کہیں انہیں گرنے سے بچانے کیلئے پتھروں سے باندھا گیا۔ سڑک پر چلتی بھینسیں ناصرف ان درختوں کے پتے کھا گئیں بلکہ کچھ بھینسیں درخت بھی ساتھ لے گئیں۔
بچوں نے بھی درخت اکھاڑ کر مصنوعی شجرکاری کا پول کھول دیا۔دوسری جانب سیکیورٹی پر تعینات پولیس اہل کار بھی 24 گھنٹے تک بھوکے پیاسے ڈیوٹی دیتے رہے جن کے لیے کھانا آیا تو وہ بھی عوام نے لوٹ لیا۔یاد رہے سابق صدر نے گزشتہ روز نوشہرو فیروز میں تقریب سے خطاب کرتے ہوئے کہا تھا کہ میاں نوازشریف اور عمران خان کو جمہوریت کی پرواہ اور قدر نہیں۔ جمہوریت کی قدر صرف اور صرف پیپلز پارٹی کو ہے۔