خانپور میں مقیم افغان باشندوں کے انخلا کی حتمی ڈیڈ لائن قریب

خانپور (نمائندہ خصوصی)ضلع ہری پور کی تحصیل خانپور اور اس کے گرد و نواح میں مقیم افغان باشندوں کی وطن واپسی کا عمل حتمی مرحلے میں داخل ہو گیا ہے۔ انتظامی ذرائع کے مطابق غیر قانونی طور پر مقیم اور متعلقہ دستاویزات سے محروم افغان شہریوں کو دی گئی مہلت ختم ہونے کے بعد انخلا کے عمل کو تیز کرنے کا فیصلہ کیا گیا ہے۔مقامی انتظامیہ اور پولیس کی جانب سے خانپور، سرائے صالح، اور مضافاتی علاقوں میں مرحلہ وار آپریشن اور چیکنگ کا سلسلہ شروع کر دیا گیا ہے تاکہ مقررہ وقت کے اندر تمام غیر مقیم غیر ملکیوں کی واپسی کو یقینی بنایا جا سکے۔ اس سلسلے میں مقامی جاگیرداروں اور دکانداروں کو بھی ہدایت کی گئی ہے کہ وہ بغیر قانونی دستاویزات کے افغان باشندوں کو رہائش یا ملازمت فراہم کرنے سے گریز کریں۔سیکیورٹی حکام کا کہنا ہے کہ حکومتی پالیسی کے تحت تمام کارروائی کو پرامن اور منظم انداز میں مکمل کیا جائے گا، جبکہ ضوابط کی خلاف ورزی کرنے والوں کے خلاف قانون کے مطابق سخت یکطرفہ کارروائی عمل میں لائی جائے گی۔