پارٹی پالیسی سے متفق مگر نواز شریف کو ہٹانانہیں چائیے

کراچی(این این آئی)سابق وزیراعظم اور پاکستان پیپلزپارٹی کے مرکزی رہنماسید یوسف رضاگیلانی نے کہاہے کہ ملک میں قبل ازوقت عام انتخابات کا کوئی امکان نہیں ہے۔ میں یہ نہیں چاہتا کہ میری طرح وزیر اعظم کو ہٹایا جائے لیکن میاں صاحب پر سنگین الزامات ہیں،وزیر اعظم کے استعفے پر پارٹی پالیسی سے متفق ہوں۔ سعید غنی کی رہائش گاہ پرمیڈیا سے بات چیت کرتے ہوئے یوسف رضاگیلانی نے کہاکہ موجودہ سیاسی صورتحال میں پیپلزپارٹی متحرک ہے ہم نے عدلیہ کا احترام کیا۔انہوں نے کہاکہ اداروں کی بقا کا خیال کرنا چاہئے میں نے اپنے کیس میں اپیل کی نہ لڑائی کی اگر اداروں میں تصادم ہوا تو کچھ نہیں بچے گا۔انہوں نے کہاکہ عدلیہ سے امید ہے وہ بروقت فیصلے کرے گی تاکہ اداروں میں تصادم کی صورتحال پیدا نہ ہو ۔سابق وزیراعظم نے کہاکہ میرا کرپشن کا کیس نہیں تھا۔ ہمارے اوپر آئین کی پاسداری لازمی ہے ۔میں یہ نہیں کہتا کہ جو میرے ساتھ ہوا وہ سب کے ساتھ ہو لیکن عدلیہ کا فیصلہ بھی ماننا چاہیے۔انہوں نے کہاکہ پانامہ کیس میں سپریم کورٹ کے ابتدائی فیصلے پر دونوں فریقین نے مٹھایاں بانٹی تھی ۔فیصلے ہمیشہ کسی کے حق اور کسی کے خلاف آتے ہیں۔۔تصادم کی صورتحال پیدا کرنے کے بجائے عدالتوں کے فیصلے تسلیم کرنے چاہئیں ۔