اسلام آباد(ویب ڈیسک) پاکستان تحریک انصاف کے ترجمان فواد چوہدری کا کہنا ہے کہ تحریک انصاف کا نوازشریف سے ذاتی جھگڑا نہیں لیکن آج عمران خان کی جدو جہد کامیاب ہوگی۔سپریم کورٹ کے باہرمیڈیا سے گفتگو کرتے ہوئے پاکستان تحریک انصاف کے ترجمان فواد چوہدری کا کہنا ہے کہ شریف فیملی کے بزنس کرپشن کو چھپانے کا پردہ تھا، شریف فیملی اپنی ذرائع آمدنی نہیں بتاسکی، اربوں روپے کا نیٹ ورک چلایا جارہا تھا جب کہ 60 دنوں کے احتساب میں 60 سالوں کی کرپشن نکلی اورجیسے جیسے کیس چلتارہا ویسے ویسے یہ لوگ بے نقاب ہوتے رہے۔فواد چوہدری نے کہا کہ پاناماکیس کے بعداگلا معاملہ اقامہ کا ہے، خواجہ آصف ملک سے باہرچلے گئے ہیں لیکن یہ کہیں بھی چلے جائیں ہم انہیں پاتال سے بھی لائیں گے۔ ان کا کہنا تھا کہ تحریک انصاف کا نوازشریف سے ذاتی جھگڑا نہیں تاہم اپوزیشن کا فرض ہے کہ وہ حکومت پر نظر رکھے۔فواد چوہدری کا کہنا تھا کہ پاکستان کی جمہوریت آگے بڑھی ہے، پاکستان کو اب سیاسی طور پربھی آگے بڑھنا چاہیے، شاید ہی پاکستان میں کسی کو اتنا فیئر ٹرائل ملا ہو، آج ثابت ہوا ہے کہ طاقتور لوگ بھی قانون سے بالا ترنہیں ہیں جب کہ آج عمران خان کی جدو جہد کامیاب ہوگی۔
