اسلام آباد (آئی این پی) سپریم کورٹ کی طرف سے پانامہ کیس کے فیصلے کے بعد جے آئی ٹی کے ارکان کی سکیورٹی کو مزید سخت کرتے ہوئے واجد ضیا، بلال رسول اور عرفان نعیم منگی کو غیر ضروری نقل و حرکت سے منع کردیا گیا۔ جے آئی ٹی سربراہ اور ارکان کی سکیورٹی رینجرز کے سپرد کر دی گئی ہے۔ جمعہ کو سپریم کورٹ کی طرف سے پانامہ کیس کا فیصلہ سنائے جانے کے بعد ایڈیشنل ڈائریکٹر جنرل ایف آئی اے واجد ضیا، ایس ای سی پی کے افسر بلال رسول، اور نیب کے ڈی جی عرفان نعیم منگی کی سکیورٹی بڑھا دی گئی ہے۔ مذکورہ تینوں افسران کو غیرضروری نقل و حرکت کرنے سے بھی منع کر دیا گیا ہے جبکہ ان تینوں افسران کی سکیورٹی پاک رینجرز کے سپرد کر دی گئی ہے۔
