ٹی ٹوئنٹی کرکٹ میں کرس گیل کے چھکوں کی بادشاہت قائم ہوگئی

جمیکا(آئی این پی)ویسٹ انڈین بلے باز کرس گیل نے حالیہ دورہ انگلینڈکے واحد ٹوئنٹی20انٹرنیشنل میچ میں چار چھکے لگاکر مختصر فارمیٹ کے انٹرنیشنل میچوں میں چھکوں کی سنچری مکمل کرنے والے دنیاکے پہلے بیٹسمین ہونے کا اعزاز حاصل کرلیا۔یوں وہ تینوں فارمیٹس کے انٹرنیشنل میچوں میں 100+ چھکے لگانے والے دنیاکے واحد بلے باز بھی بن گئے ہیں۔ کرس گیل نے اب تک اپنے ٹوئنٹی20کیریئرکی49 میں سے 9اننگزمیں پانچ یا زائد چھکے لگانے کا بھی اعزاز حاصل کیاہے۔چیسٹرلی اسٹریٹ کے مقام پر کھیلے گئے انگلینڈکے خلاف حالیہ ٹوئنٹی20میچ سے قبل کرس گیل51میچوں کی 48اننگزمیں99 چھکے جڑچکے تھے۔واضح رہے کہ ٹوئنٹی20انٹرنیشنل میچوں کی تاریخ میں کرس گیل کے علاوہ برینڈن میکولم واحد بلے باز ہیں جو 90 سے زائد چھکے لگاچکے ہیں۔جن کے بعد شین واٹسن 83چھکوں کے ساتھ موجود ہیں۔