اسلام آباد (این این آئی) جمعیت علمائے اسلام (س)کے سربراہ مولانا سمیع الحق سے ملاقات کے ایک دن بعد پاکستان میں افغانستان کے سفیر عمر زاخیل وال نے اسلام آباد میں جمعیت علمائے اسلام (ف)کے سربراہ مولانا فضل الرحمن سے ملاقات کی اور ان سےافغانستان میں امن اور طالبان سے مذاکرات کے سلسلے میں مدد مانگ لی۔ ملاقات میں افغانستان کے نائب سفیر زردشت شمس بھی شریک تھے۔ عمر زاخیل وال نے اپنے ٹوئٹر پر کہاکہ مولانا فضل الرحمن کے ساتھ ان کی ملاقات جامع تھی جس میں اہم معاملات پر بات چیت کی گئی۔ افغان ذرائع نے بتایا کہ افغان سفیر کی پاکستانی مذہبی رہنماﺅں کےساتھ ملاقاتوں کا بنیادی مقصد افغانستان میں جاری لڑائی کےخلاف ان کے بیانات کے ذریعے حمایت حاصل کرنا ہے۔ یہ ملاقاتیں ایسے حالات میں ہورہی ہیں جبکہ طالبان نے افغانستان میں حالیہ دنوں میں کئی بڑے حملے کئے ہیں کابل ¾ غزنی ¾ قندھار اور پکتیکا میں فوجی اور پولیس کے مراکز پر گزشتہ چند دنوں کے حملوں میں تقریبا200افراد جاں بحق ہوئے اس کے علاوہ داعش نے بھی کابل میں گزشتہ ہفتے اہل تشیع کی مسجد پر حملہ کر کے درجنوں افراد کو قتل کیا تھا ۔ذرائع کے مطابق امکان ہے کہ افغان سفیر پاکستانی سیاسی رہنماﺅں سے مزید ملاقاتیں کریں ۔ذرائع کے مطابق مولانا فضل الرحمن اور مولانا سمیع الحق کا طالبان پر اثرورسوخ موجود ہے اور افغان سفیر کی جمعیت علمائے اسلام کے رہنماﺅں سے ملاقاتیں اس تناظر میں کی گئی ہیں ۔افغان سفیر چاہتے ہیں کہ پاکستانی مذہبی رہنماﺅں کی طرف سے افغانستان میں حالیہ لڑائی کےخلاف بیانات جاری کئے جائیں۔ دریں اثناءافغانستان کے سفیر عمر زاخیل وال نے امریکی سفیر ڈیوڈ ہیل سے بھی ملاقات کی جس میں افغانستان کی صورتحال سمیت مختلف امورپر تبادلہ خیال کیا گیا۔
