لاہور‘ کراچی (نیااخبار رپورٹ) سندھ حکومت نے جانوروں کے بھی شناختی کارڈ بنانے کا فیصلہ کر لیا۔ پاکستان کی انتظامی تاریخ کا منفرد قانون بنانے کی تیاری اس وقت زور و شور سے جاری ہے، جس کی منظوری کے بعد ملک میں انسانوں کے بعد جانوروں کو بھی شناختی کارڈ کا اجراءکیا جائے گا۔ جانوروں کے لئے بھی نادرا کی طرز کا ادارہ بنایا جائے گا، جس کے ذریعے انہیں شناختی کارڈ،
ویزا اور پاسپورٹ بھی دیئے جائیں گے۔ تفصیلات کے مطابق سندھ حکومت کے محکمہ لائیوسٹاک نے انوکھا بل تیار کیا ہے، جس کے تحت سندھ لائیو اسٹاک رجسٹریشن اتھارٹی کا قیام عمل میں لایا جائے گا۔ جانوروں کا سینٹرل ڈیٹا بیس بنایا جائے گا۔ ان کی نقل و حرکت اور پیدائش و انتقال کے بارے میں لائیوسٹاک اتھارٹی کو آگاہ کرنا ہوگا اور دستاویز لینا ہوگی۔ کمپیوٹرائزڈ ڈیٹا بیس میں جانوروں کی پیدائش و اموات کا اندراج ہوگا۔ ہر جانور کو مخصوص شناختی کوڈ جاری کیا جائے گا اور انہیں ذبح خانوں میں لانے پر اتھارٹی کو اطلاع دینا لازمی ہوگی۔ لائیوسٹاک اتھارٹی جانوروں کی ویلفیئر اور نیوٹریشن پر کام کرے گی، جبکہ قصابوں کی تربیت اور ان کی رجسٹریشن ہوگی۔ واضح رہے کہ اس سے قبل حکومت پنجاب بھی صوبے کے جانوروں کی مردم شماری کا فیصلہ کرچکی ہے اور اس سلسلے میں متعلقہ محکموں کو ہدایات مل چکی ہیں۔
جانور‘ شناختی کارڈ
