لاہور( این این آئی) پاکستان پیپلز پارٹی یوم تاسیس کی گولدن جوبلی تقریبات کے سلسلہ میں آج وفاقی دارالحکومت میں اپنی سیاسی طاقت کا مظاہرہ کرے گی ۔ جلسے سے پیپلز پارٹی کے چیئرمین بلاول بھٹو زرداری اور دیگر مرکزی رہنما خطاب کریں گے۔ پریڈ گراﺅنڈ میں منعقدہ جلسے میں آزاد کشمیر اور گلگت بلتستان سمیت چار وں صوبوں سے کارکنوں کے قافلے شریک ہوں گے ۔پیپلز پارٹی نے جلسے کے لئے تمام انتظامات کو حتمی شکل دیدی ہے جبکہ سکیورٹی کےلئے بھی انتہائی سخت انتظامات کئے گئے ہیں۔ ذرائع کے مطابق بلاول بھٹو آج کے جلسے میں ملک کو درپیش مسائل پر کھل کر بات کریں گے جبکہ اس کے ساتھ مسلم لیگ (ن) اور پی ٹی آئی کی قیادت کو بھی تنقید کا نشانہ بنایا جائے گا ۔ پیپلز پارٹی کے حلقوں میں آج اسلام آباد میں منعقد ہونے والے جلسے کو انتہائی اہمیت کا حامل قرار دیا جارہا ہے ۔
