لاہور (خصوصی رپورٹ)قومی احتساب بیورو نے مسلم لیگ ق کے چودھری برادران سے انتخابی اخراجات کی تفصیلات مانگ لیں۔ تفصیلات کے مطابق نیب کی جانب سے سابق وزیراعظم چودھری شجاعت حسین اور سابق نائب وزیراعظم چودھری پرویز الٰہی کے مبینہ غیر قانونی اثاثوں کی تحقیقات جاری ہیں۔ نیب نے چودھری برادران سے الیکشن مہم ہونے والے اخراجات کا بھی ریکارڈ طلب کرتے ہوئے کہا کہ اب تک جتنے الیکشنز میں حصہ لیا ان کی انتخابی مہم پر خرچ کردہ رقم کی تفصیلات فراہم کی جائیں۔ نیب نے چودھری شجاعت اور چودھری پرویز الٰہی کو انتخابی رقم کے ذرائع و وسائل سے بھی آگاہ کرنے کی ہدایت کی ہے۔ ذرائع کے مطابق نیب لاہور نے الیکشن کمیشن سے بھی چودھری برادران کے انتخابی اخراجات کی تفصیلات طلب کرنے کا فیصلہ کیا ہے۔ الیکشن کمیشن سے یہ تفصیلات دو ہفتے میں فراہم کرنے کا کہا جائے گا۔ نیب ذرائع کے مطابق چودھری برادران اور الیکشن کمیشن کی جانب سے موصول تفصیلات کا آزاد ذرائع سے موازنہ کیا جائے گا، ملزمان کی جانب سے غلط جواب جمع کرانے پر انہیں پانچ برس تک سزا بھی ہو سکتی ہے۔ واضح رہے کہ نیب آمدن سے زائد اثاثہ جات کیس میں چودھری برادران کے خلاف 2 ارب 42 کروڑ روپے سے زائد اثاثوں کی چھان بین کر رہا ہے۔
