جکارتہ (اے پی پی) ایشین گیمز مینز والی بال ایونٹ میں پاکستان نے منگولیا کو ہرا کر فاتحانہ آغاز کیا۔ گرین شرٹس کو (کل) بدھ کو ایران کا چیلنج درپیش ہو گا۔ انڈونیشیا میں جاری میگا گیمز میں پیر کو کھیلے گئے مینز والی بال ایونٹ کے گروپ بی کے پہلے میچ میں پاکستانی ٹیم نے شاندار کھیل پیش کرتے ہوئے حریف منگولین ٹیم کو 3-0 سیٹس سے ہرا کر ایونٹ میں جاندار انٹری کی، پاکستانی ٹیم ایونٹ میں اپنا دوسرا گروپ میچ کل بدھ کو ایران کے خلاف کھیلے گی۔ مینز کبڈی ٹورنامنٹ میں پاکستان کو ایران کے ہاتھوں شکست کا سامنا کرنا پڑا۔ گروپ بی کے میچ میں ایران نے شاندار کھیل پیش کرتے ہوئے پاکستان کو 20 کے مقابلے میں 36 پوائنٹس سے ہرا کر مسلسل دوسری کامیابی حاصل کی، پاکستانی ٹیم نے پہلے میچ میں ملائیشیا کو ہرایا تھا، گرین شرٹس ایونٹ میں اپنا تیسرا گروپ میچ آج منگل کو انڈونیشیا کے خلاف کھیلے گی۔
