ایشین گیمز سکواش میں پاکستانی ٹیم کافاتحانہ آغاز

جکارتہ (اے پی پی) اٹھارہویں ایشین گیمز مینز سکواش ٹیم ایونٹ میں پاکستان نے جاپان اور نیپال کو شکست دے کر مسلسل دو فتوحات حاصل کر لیں، ویمنز ٹیم کو دونوں میچز میں ناکامیوں کا سامنا کرنا پڑا۔ انڈونیشیا میں جاری میگا گیمز میں پیر کو کھیلے گئے مینز سکوئش ٹیم ایونٹ میں پاکستانی ٹیم نے پہلے میچ میں جاپان کو 2-1 سے شکست دے کر فاتحانہ آغاز کیا، پاکستانی کھلاڑی محمد عاصم خان کو پہلے سنگل مقابلے میں شکست کا سامنا کرنا پڑا لیکن طیب اسلم اور اسرار احمد نے اپنے اپنے حریفوں کو ہرا کر ٹیم کو 2-1 سے کامیابی دلائی، پاکستان نے نیپال کے خلاف میچ میں بھی عمدہ کارکردگی کے تسلسل کو برقرار رکھتے ہوئے 3-0 سے کامیابی سمیٹی، یہ گرین شرٹس کی مسلسل دوسری فتح ہے، عاصم، طیب اسلم اور اسرار احمد نے تینوں سنگلز میچز جیت کر ٹیم کو کامیابی دلائی۔ پاکستانی ٹیم ایونٹ میں آج منگل کو مزید دو میچز کھیلے گی، پہلے میچ میں اس کا مقابلہ فلپائن سے ہو گا جبکہ دوسرے میچ میں اسے ہانگ کانگ کا چیلنج درپیش ہو گا، گرین شرٹس پانچواں اور آخری میچ 30 اگست کو جنوبی کوریا کے خلاف کھیلے گی، دوسری جانب ویمنز ٹیم ایونٹ میں پاکستانی ٹیم کو ابتدائی دونوں میچز میں ناکامیوں کا سامنا کرنا پڑا۔، گرین شرٹس کو پہلے میچ میں ملائیشیا اور دوسرے میچ میں جنوبی کوریا کے ہاتھوں ناکامیوں کا سامنا کرنا پڑا، پاکستانی ٹیم اپنا تیسرا میچ آج منگل کو جاپان کے خلاف کھیلے گی جبکہ چوتھے اور آخری گروپ میچ میں گرین شرٹس کو 30 اگست کو فلپائن کا چیلنج درپیش ہو گا۔