ممبئی(ویب ڈیسک) امریکی نڑاد بھارتی فلمساز رادھا بھردواج نے بالی ووڈ کے ایکشن ہیرو اکشے کمار کی آنے والی فلم’مشن منگل‘کی کہانی پر چوری کاالزام لگادیا۔اداکاراکشے کمار نے تقریباً ایک ہفتے قبل ٹوئٹر پر فلم’مشن منگل‘میں کام کرنے کا اعلان کرتے ہوئے کہا تھا کہ ’یہ فلم ان عام لوگوں کی طاقتور سچی کہانی پر مبنی ہے جن کے خواب غیر معمولی تھے، اس کے ساتھ ہی انہوں نے فلم کو اگلے سال 15 اگست کو ریلیز کرنے کا اعلان بھی کیاتھا۔‘تاہم ابھی فلم کی شوٹنگ شروع بھی نہیں ہوسکی ہے اور فلم کی کہانی پر چوری کا الزام لگ گیا۔ میڈیا رپورٹس کے مطابق امریکی نڑاد بھارتی فلمساز رادھا بھردواج نےالزام لگایا ہے کہ پروڈکشن کمپنی ایلپسیس انٹرٹیمنٹ نے کاپی رائٹ ایکٹ کی خلاف ورزی کی ہے، انہوں نے کہا کہ انہوں نے اس فلم کی کہانی 2016 میں پروڈیوسر اتول کاس بیکر کو سنائی تھی، تاہم کاس بیکرز اسٹوڈیو نے ان کی کہانی کا اسکرپٹ اداکارہ ودیا بالن کے ساتھ شیئر کیا اور ودیا بالن نے ان کا آئیڈیا چوری کرلیا۔رادھا بھردواج نے فلم کے اسکرپٹ کو امریکی کاپی رائٹ آفس میں 2016 میں رجسٹرڈ بھی کروایاتھا۔ رادھا کا کہنا ہے کہ میں شرط لگاکر کہہ سکتی ہوں کہ کہانی کی حقیقت کے متعلق اداکار اکشے کمار، فوکس اسٹار اور امریکی پارٹنرز کچھ نہیں جانتے ہوں گے، لیکن اب انہیں سب معلوم ہوگیا ہے لہٰذا میں ان سے درخواست کرتی ہوں کہ وہ اس کے متعلق سنجیدہ ردعمل دیں۔ اس کے ساتھ ہی رادھا نے کہا کہ ان کے پاس تمام کاغذات ہیں جن سے ثابت ہوتا ہے کہ انہوں نے2014 میں اس کہانی پر کتنا کام کیاتھا۔رادھا بھردواج نے اپنی کہانی چوری ہونے پر’مشن منگل‘ کی ریلیز کو روکنے کے لیے مقدمہ بھی درج کروایاہے۔ ان کی وکیل سرشی اوجھا کا کہنا ہے کہ منگل یان پر بے شمار کہانیاں ہوسکتی ہیں لیکن ان کی کلائنٹ رادھا کی کہانی ایک خاتون انجنیئر کے گرد گھومتی ہے جو اس مشن پر کام کررہی ہے۔واضح رہے کہ فلم میں اداکار اکشے کمارکے علاوہ دیگر کاسٹ میں سوناکشی سنہا، تاپسی پنوں، شرمن جوشی، کیرتی کلہاری، نتیا مینن اور ودیابالن شامل ہیں۔
