دبئی (ویب ڈیسک) آپ اس شیشے کے ڈبے میں سے سونے کی یہ اینٹ نکالنے میں کامیاب ہوجائیں تو یہ آپ کی ہوجائے گی۔ اگر آپ آئندہ چند دنوں میں دبئی کے سفر پر جانے والے ہیں یا اس وقت وہاں موجود ہیں تو آپ کے لیے کروڑپتی ہونے کا ایک نادر موقع ہے۔ دبئی ایئرپورٹ پر شیشے کے باکس میں ایک 20کلو گرام وزنی سونے کی اینٹ رکھی ہوئی ہے اور ایئرپورٹ پر آنے والوں کے لیے دعوتِ عام ہے کہ جو شخص اس اینٹ کو باکس سے نکال لے، اینٹ اس کی ہو جائے گی۔ٹائمز آف انڈیا کے مطابق شیشے کے اس باکس میں ایک چھوٹا سا سوراخ ہے جس میں سے بمشکل ہاتھ اندر جاتا ہے۔ ایک ویڈیو بھی منظرعام پر آئی ہے جس میں کئی لوگ اس اینٹ کو باکس سے نکالنے کی کوشش کر رہے ہوتے ہیں تاہم سبھی ناکام ہوتے ہیں کیونکہ سوراخ اتنا چھوٹا ہے کہ یا تو اس میں سے ہاتھ واپس باہر نکل سکتا ہے یا پھر اینٹ۔ لوگ اینٹ اٹھا کر سوراخ کے قریب تو لے آتے ہیں لیکن پھر انہیں اینٹ چھوڑ کر ہاتھ باہرنکالنا پڑتا ہے۔ آپ بھی اگر دبئی میں ہیں یا جا رہے ہیں تو ضرور قسمت آزمائیے۔
