لندن(ویب ڈیسک)آسٹریلین فاسٹ باﺅلر مچل اسٹارک نے ون ڈے کرکٹ میں تیز ترین 150 وکٹیں لینے کا پاکستانی اسپنر ثقلین مشتاق کا 21 سالہ ریکارڈ توڑ دیا۔پاکستان کے سابق ٹیسٹ کرکٹر اور جادوگر آف اسپنر ثقلین مشتاق نے 2 دہائیوں قبل بھارت کے خلاف کھیلتے ہوئے ون ڈے میچز میں تیز ترین 150 وکٹیں لینے کا ریکارڈ اپنے نام کیا تھا جو انہوں نے 78 میچز میں بنایا تھا۔خیال رہے کہ ثقلین مشتاق پاکستان کرکٹ کی تاریخ کے نہ صرف بہترین آف اسپنر سمجھے جاتے ہیں بلکہ صف اول کے باﺅلرز میں سے ایک ہیں۔انگلینڈ میں ہونے والے ورلڈکپ 2019 میں ویسٹ انڈیز کے خلاف اپنے کیئریر کا 77واں میچ کھیلتے ہوئے مچل اسٹارک نے یہ سنگ میل عبور کیا۔مچل اسٹارک نے شاندار باﺅلنگ کا مظاہرہ کرتے ہوئے ویسٹ انڈیز کے 5 کھلاڑیوں کو آﺅٹ کیا اور اپنی 150 وکٹیں مکمل کیں جبکہ ٹیم کو 15 رنز سے فتح دلوائی۔یہاں یہ بات قابل غور ہے وقت کے اعتبار سے تیز ترین 150 وکٹیں لینے کا اعزاز اب بھی سابق آف اسپنر ثقلین مشتاق کے ہی پاس ہے۔مچل اسٹارک نے اپنی 150 وکٹیں 8 سال اور 2 سو 29 دن میں مکمل کیں لیکن پاکستانی لیگ اسپنر کو یہ اعزاز حاصل کرنے میں صرف 2 سال اور ایک سو 9 دن لگے۔ثقلین مشتاق کی تیزی کا اندازہ اس بات سے لگایا جاسکتا ہے کہ ان کے بعد دوسرے نمبر پر وقت کے اعتبار سے تیز ترین وکٹیں لینے کا ریکارڈ 4 سال میں بنا۔سابق آسٹریلین فاسٹ باﺅلر بریٹ لی نے 82 میچز میں یہ کارنامہ انجام دیا لیکن انہوں نے 4 سال 42 دن لگائے۔
