راولپنڈی(ویب ڈیسک)پاک فوج نے 6 ستمبر یوم دفاع سے متعلق خصوصی پرومو جاری کردیا۔پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے سماجی رابطوں کی ویب سائٹ پر پرومو جاری کیا۔ڈی جی آئی ایس پی آر نے اپنے پیغام میں لکھا کہ’ یوم دفاع و شہداء 6 ستمبر 2019، پچھلے سال کی طرح آئیں ہر شہید کے گھر چلیں، ہر شہید کو یاد رکھا جائے’۔
میجر جنرل آصف غفور نے ٹوئٹ کے ساتھ ہیش ٹیک آئیں چلیں شہید کے گھر اور ہیش ٹیگ کشمیر بنے کا پاکستان استعمال کیا۔خیال رہے کہ 28 اگست کو ڈی جی آئی ایس پی آر میجر جنرل آصف غفور نے یومِ شہدا و دفاع منانے سے متعلق تقریب کی تفصیلات جاری کی تھیں۔میجر جنرل آصف غفور نے کہا تھا کہ اس بار ”کشمیر بنے گا پاکستان“ یوم دفاع کی تقریبات کا حصہ ہوگا، یومِ دفاع و شہدا کی تقریب کے فارمیٹ میں تبدیلی کی گئی ہے، اس بار جی ایچ کیو میں شام کے وقت مرکزی تقریب نہیں ہوگی بلکہ تقریب کو دن کے وقت رکھا گیا ہے جس میں صرف شہداءکے لواحقین اور غازی شرکت کریں گے، آرمی چیف شہداءکے لواحقین اور غازیوں سے ملاقات کریں گے جب کہ آرمی چیف جی ایچ کیو میں یاد گارِ شہداء پر حاضری دیں گے اور پھول رکھیں گے۔میجر جنرل آصف غفور نے مزید بتایا کہ اسی طرح فارمیشن اور شہر شہر تقریبات ہوں گی، یومِ دفاع کی مناسبت سے چھاﺅنیوں میں ہتھیاروں کی نمائش ہوگی۔ترجمان پاک فوج کا کہنا تھا کہ عوام سے درخواست ہے شہیدوں کے لواحقین سے ملیں اور ان کا شکریہ ادا کریں، گلی گلی محلے محلے شہیدوں کی تصاویر آویزاں کی جائیں، عظیم قومیں اپنے شہیدوں کو یاد رکھتی ہیں۔انہوں نے کہا کہ اس سال بھی ہر شہید کے گھر پہنچیں گے، پچھلے سال کی طرح عوامی مقامات پر شہیدوں کی تصاویر لگائی جائیں گی، شہید کی گلی، محلے، گاﺅں اور شہر میں ان کی تصاویر لگائی جائیں گی۔ڈی جی آئی ایس پی آر نے بتایا کہ ’کشمیر بنے گا پاکستان‘ تقریبات کا حصہ ہو گا۔
