لاہور(ویب ڈیسک)وفاقی تحقیقاتی ادارے ’ایف آئی اے‘ نے معروف اداکارہ و ماڈل صوفیا مرزا کے خلاف منی لانڈرنگ کیس کی تفتیش شروع کردی۔گزشتہ چند دنوں سے سوشل میڈیا پر یہ خبریں گردش کر رہی تھیں کہ صوفیا مرزا کے خلاف ایف آئی اے نے منی لانڈرنگ کی تحقیقات شروع کردی، تاہم اداکارہ نے ان خبروں کو مسترد کردیا تھا۔سوشل میڈیا پر خبریں سامنے آنے کے بعد اداکارہ نے ٹوئٹر پر اپنی دو ویڈیوز میں دعویٰ کیا تھا کہ ان کے خلاف کسی طرح کی کوئی بھی تفتیش نہیں کی جا رہی بلکہ ان کے خلاف جھوٹی اور پروپیگنڈا کے تحت خبریں چلائی جا رہی ہیں۔صوفیا مرزا نے ویڈیوز میں دعویٰ کیا تھا کہ ان کے خلاف ان کے سابق شوہر عمر فاروق ظہور کے کہنے پر جھوٹی خبریں پھیلائی جا رہی ہیں جو ان کی دو بیٹیوں کے اغوا میں ملوث ہے۔اداکارہ و ماڈل کا کہنا تھا کہ انہیں یقین ہے کہ ان کے سابق شوہر ہی پروپیگنڈا کے تحت جھوٹی خبریں پھیلا رہے ہیں اور انہوں نے ایسی خبریں پھیلانے والے سوشل میڈیا پیجز اور صارفین کے خلاف ایف آئی اے کے سائبر ونگ میں شکایت درج کروادی ہے۔اداکارہ نے ساتھ ہی دعویٰ کیا کہ ان کا سابق شوہر نہ صرف ان کی بیٹیوں کو اغوا کرنے میں ملوث ہے بلکہ وہ پاکستان سمیت یورپی ملک ناروے میں بھی پولیس اور تفتیشی اداروں کو مطلوب ہے۔اداکارہ نے لوگوں سے درخواست کی کہ ان کے خلاف جھوٹی خبریں نہ پھیلائی جائیں، تاہم اب ایف آئی اے نے اس بات کی تصدیق کی ہے کہ اداکارہ کے خلاف تفتیش شروع کردی گئی۔ایف آئی اے نے ذرائع کو بتایا کہ صوفیا مرزا کے خلاف قومی احتساب بیورو (نیب) کی جانب سے کیس منتقل کیے جانے کے بعد تفتیش شروع کی گئی۔ایف آئی نے کیس کی مزید تفصیل بتانے سے گریز کیا، تاہم اس بات کی تصدیق کی کہ صوفیا مرزا کے خلاف منی لانڈرنگ کیس کی تفتیش شروع کردی گئی۔خیال رہے کہ صوفیا مرزا سے قبل ماڈل ایان علی پر بھی منی لانڈرنگ کا مقدمہ چلایا گیا تھا اور اس مقدمے نے ملکی سیاست میں ہلچل بھی مچادی تھی۔ایان علی کو منی لانڈرنگ کیس میں کئی ماہ تک جیل میں بھی قید رہنا پڑا تھا اور اب بھی ان کے خلاف یہ کیس جاری ہے اور وہ ضمانت پر رہا ہیں۔
