لاہور (خصوصی رپورٹر) حکومت اورشہریوں کے اشتراک سے غریب او رنادار افراد کے لئے راشن اور امدادی سامان کی فراہمی کا آغازکر دیا گیاہے-وزیراعلیٰ پنجاب سردار عثمان بزدار کی اپیل پر مخیر حضرات او رتاجر برادری نے کروڑوں روپے مالیت کے امدادی سامان کے خطیر عطیات پیش کئے ہیں- مختلف اضلاع کے لئے پہلے مرحلے میں 100ٹرکوں پر مشتمل راشن اور امدادی سامان موصول ہوچکا ہے-وزیراعلیٰ عثمان بزدار نے پنجاب یونیورسٹی گراﺅنڈ آکر اپنی نگرانی میں امدادی سامان سے بھرے ٹرک متعلقہ اضلاع کو روانہ کئے- وزیراعلیٰ عثمان بزدار نے اس موقع پر گفتگو کرتے ہوئے بتایا کہ پنجاب میں بے روزگار او رضرورت مند افراد کو گھروں میں راشن او رامدادی سامان مہیاکیاجائے گا- امدادی سامان کے 100ٹرک ضرورت کے مطابق مختلف اضلاع میںبھیجے جا رہے ہیں-عثمان بزدار نے کہاکہ مخیر حضرات اور تاجر برادری کے تعاون سے مزید امدادی سامان فراہم کیا جائے گا-امدادی سامان اور راشن کی فراہمی کا سلسلہ مرحلہ وار دیگر اضلاع تک بڑھائیں گے- وزیراعلیٰ نے کہاکہ کورونا کی وجہ سے پیدا ہونے والے حالات سے متاثرہ خاندانو ں کوتنہا نہیں چھوڑیں گے – تجارتی اداروں کی بندش سے بے روزگاری کا سامنا کرنے والوں کا بھرپور ساتھ دیں گے- ہر شہری کی ضروریات اور مشکلات کو حل کرنا چاہتے ہیں-وزیراعلیٰ عثمان بزدار نے کہاکہ مشکلات کا شکار افراد کااحساس اور مددکرنا سنت نبوی ہے- نادار افراد کی معاونت کرنے پر مخیر حضرات اور تاجر برادری کا شکریہ ادا کرتے ہیں-مشکل گھڑی میںاپنے لوگوں کی مدد کرنے والے قابل قدر اور قابل تقلید ہیں-اس موقع پر بتایا گیا کہ لاہوراو رراولپنڈی میں 25،25 ٹرک امدادی سامان تقسیم کیا جائے گا- گوجرانوالہ20،جہلم 5، اسلام آباد 5، جھنگ 2،سرگودھا8،شیخوپورہ میں5ٹرک بھیجے جائیں گے -سامان کی تقسیم کے لئے ڈپٹی کمشنر کی سربراہی میں ہر ضلع میں خصوصی کمیٹی قائم کی گئی ہے-خصوصی کمیٹی میں ارکان اسمبلی ،دیگر نمایاں شخصیات اور حکام شامل ہوں گے -متعلقہ ڈپٹی کمشنر اور مقامی انتظامیہ کی مرتب کردہ مصدقہ لسٹ میں نادار اور ضرورت مندا فراد کے نام اور تصاویر بھی موجود ہوں گی-متعلقہ اضلاع میں ڈپٹی کمشنر کی زیر نگرانی ویئر ہاﺅس میں سامان رکھ کر تقسیم کیا جائے گا-قبل ازیں پنجاب یونیورسٹی پہنچنے پر وزیراعلیٰ کو امدادی سامان کی تقسیم کے بارے میں بریفنگ دی گئی اورپروگرام کی کامیاب تکمیل کے لئے دعا خیر بھی کی گئی- سینئر ممبربورڈ آف ریونیو،کمشنر لاہور ڈویژن،سیکرٹری اطلاعات، سی سی پی او لاہور،پنجاب یونیورسٹی کے وائس چانسلر ڈاکٹر نیاز احمد، ڈی جی پی ڈی ایم اے اور دیگر بھی موجودتھے- وزیراعلیٰ عثمان بزدار نے وزراءکو اضلاع میں کورونا کے ساتھ گندم خریداری مہم کی نگرانی کرنے کا ٹاسک بھی سونپ دیاہے-وزیراعلیٰ پنجاب کے آفس سے جاری ہونے والے اعلامیہ کے مطابق صوبائی وزرائ، مشیران او رمعاونین خصوصی متعلقہ اضلاع میں گندم خریداری مہم کی مانیٹرنگ بھی کریں گے-وزیراعلیٰ کی طرف سے وزراء، معاونین او ر مشیران کو محکمہ صحت ، خوراک اور انتظامیہ سے فوری رابطے کی ہدایت کی گئی ہے اور یہ بھی کہا گیاہے کہ وزراءکرام ، معاونین او رمشیران متعلقہ اضلاع میں کورونا کی صورتحال اورگندم خریداری پر وزیراعلیٰ آفس کو رپورٹ دیں گے -صوبائی وزیر چودھری ظہیر الدین فیصل آباد ، رائے تیمور جھنگ،مہر اسلم چنیوٹ میں گندم خریداری کی نگرانی کریں گے -آشفہ ریاض ٹوبہ ٹیک سنگھ، یاسمین راشدلاہور، ہاشم ڈوگر قصور،ملک اسد ننکانہ او رمیاں خالد شیخوپورہ میں مانیٹرنگ کریں گے -راجہ راشد حفیظ راولپنڈی ، حافظ عمار یاسر چکوال، آصف محمود جہلم، ملک انور اٹک ،عنصر مجید خان نیازی سرگودھا میں نگرانی کریں گے-ممتاز احمد خوشاب، امیر محمد خان بھکر، میاں محمودالرشید گوجرانوالہ اور محمد رضوان کے ذمہ گجرات ہوگا-عمر فاروق حافظ آباد ، محمد اجمل منڈی بہاﺅالدین ، پیر سید سعید الحسن شاہ نارووال اورمحمد اخلاق سیالکوٹ میں گندم خریداری کی نگرانی کریں گے-ملک نعمان ساہیوال، صمصام بخاری اوکاڑہ، فیصل حیات پاکپتن، سمیع اللہ چودھری بہاولپور، شوکت لالیکا بہاولنگرمیں ہوں گے-محسن لغاری رحیم یارخان ،محمداختر ملتان ، سید حسین جہانیاں گردیزی خانیوال ، زوار وڑائچ لودھراں ، جہانزیب کھچی وہاڑی میں نگران ہوں گے- حنیف پتافی ڈی جی خان، حسنین بہادر دریشک راجن پور، عبدالحئی دستی مظفر گڑھ ، سید رفاقت گیلانی لیہ میں مانیٹرنگ کریں گے -وزیراعلیٰ نے مزید کہاکہ حکومت کاشتکاروں کے حقوق اور صحت کا تحفظ یقینی بنائے گی -گندم خریداری کے دوران کورونا وائرس کی وجہ سے حتیٰ الامکان اجتماع سے گریز لازمی ہے-گندم کی کٹائی کے لئے انسانی وسائل کی بجائے مشینری پر انحصار سود مند ثابت ہوگا- وزیراعلیٰ پنجاب سردار عثمان بزدار کی خصوصی ہدایت پر چیف منسٹر انصاف امداد پروگرام کے تحت ایک لاکھ 70ہزار مستحق افراد کو مالی امداد پہنچا دی گئی ہے- مستحق افراد میں 24گھنٹے کے اندر تقریبا ً 150کروڑ روپے کی مالی امداد تقسیم کی گئی ہے-وزیراعلیٰ عثما ن بزدار نے کہاکہ چیف منسٹر انصاف امداد پروگرام کے تحت دیگر مستحق افراد کو بھی کوائف کی تصدیق کے بعد فوری طو رپر مالی امداد دی جائے گی-پنجاب حکومت کا چیف منسٹر انصاف امداد پروگرام رفتار، معیاراور شفافیت کے حوالے سے اپنی مثال آپ ہے اورہم جو کہتے ہیں وہ کرکے دکھاتے ہیں-انہوںنے کہاکہ ماضی کے حکمرانوں کی طرح نمائش کرتے ہیں نہ شوبازی- چیف منسٹر انصاف امداد پروگرام کے تحت اصل حقداروں کو ان کا حق پہنچائیں گے- وزیراعلیٰ پنجاب سردار عثمان بزدارنے تونسہ کے علاقے بستی کھیوے والی میں غلط انجکشن سے باپ بیٹی کے جاںبحق ہونے کے واقعہ کا نوٹس لیتے ہوئے کمشنر ڈیرہ غازی خان سے رپورٹ طلب کرلی ہے- وزیراعلیٰ نے واقعہ کی تحقیقات کاحکم دیتے ہوئے کہاکہ افسوسناک واقعہ کی غیر جانبدارانہ انکوائری کر کے ذمہ داروں کا تعین کیا جائے -انہوںنے کہاکہ واقعہ کے ذمہ داروں کےخلاف قانون کے تحت کارروائی کی جائے-وزیراعلیٰ عثمان بزدارنے جاں بحق باپ بیٹی کے لواحقین سے دلی دکھ او رافسوس کا اظہاربھی کیاہے-
