کراچی(ویب ڈیسک) کورونا وائرس کے پھیلاﺅکے باعث ڈپٹی کمشنر ایسٹ نے کراچی کی 12 یونین کونسلیں سیل کرنے کے احکامات جاری کر دیئے ہیںاس ضمن میں جاری نوٹیفکیشن کے مطابق 12 یوسیز میں نہ کسی شخص کو جانے کی اجازت ہوگی نہ باہر آنے کی، رینجرز اور پولیس کی نفری ان علاقوں میں تعینات رہیں گی. ڈپٹی کمشنر ضلع شرقی کے دفتر سے جاری حکم نامے کے مطابق ضلع شرقی میں 11 یونین کونسلوں کو مکمل طور پر سیل کرنے کا حکم جاری کیا گیا ہے‘ یہ اقدام ان علاقوں میں کورونا وائرس کے مصدقہ متاثرین سامنے آنے کے باعث اٹھایا گیا ہے۔ پولیس اور رینجرز کو حکم دیا گیا ہے کہ وہ ان 11 یونین کونسلوں کو سیل کر دیں جن میں‘یو سی 6 گیلانی ریلویز‘یو سی 7 ڈالمیا‘یو سی 8 جمالی کالونی‘یو سی 9 گلشن-2‘یو سی 10 پہلوان گوٹھ‘یو سی 12 گلزارِ ہجری‘یو سی 13 صفورہ گوٹھ‘یو سی 14 فیصل کینٹ‘یو سی 2 منظور کالونی‘یو سی 9 جیکب لائن اوریو سی 10 جمشید کوارٹرزشامل ہیںڈپٹی کمشنر کراچی شرقی احمد علی کا کہنا ہے کہ مذکورہ علاقوں میں راشن کی دکانیں اور طبی سہولیات کھلی رہیں گی۔ سندھ حکومت کے ترجمان مرتضی وہاب نے بتایا ہے کہ یوسیز سیل کرنے کا فیصلہ اس لیے کیا ہے کیونکہ وہاں سے کورونا وائرس کے 149 کیسز مثبت آئے ہیں انہوں نے کہا کہ صوبے میں لاک ڈاﺅن میں نرمی یا سختی سے متعلق ابھی فیصلہ نہیں کیا جبکہ متعلقہ یوسیز میں نقل و حرکت پر مکمل پابندی ہوگی. مرتضی وہاب نے کہا کہ ان ہی یوسیز میں اموات بھی ہوئی ہیں، متعلقہ یوسیز میں پولیس اور رینجرز کو تعینات کیا جائیگا انہوں نے کہا کہ جیسے ہی لاک ڈاﺅن سے متعلق فیصلہ کیا جائیگا تو شیئر کریں گے، متعلقہ یوسیز میں کھانے کی اشیا، ادویات لینے شہری نکل سکتے ہیں۔ وزیراعلیٰ سندھ مراد علی شاہ نے صوبے میں مزید 104 کیسز اور 6 اموات کی تصدیق کی ہے‘سماجی رابطوں کی ویب سائٹ ٹوئٹر پر ایک مختصر ویڈیو پیغام میں انہوں نے کہا کہ سندھ میں مزید 104 لوگوں کے متاثر ہونے سے تعداد 1318 ہوگئی ہے۔ انہوں نے کہا کہ صوبے میں 20 فیصد ٹیسٹ مثبت آئے ہیں جو دنیا کی اوسط سے بھی زیادہ ہے جبکہ گزشتہ 24 گھنٹوں میں کورونا وائرس سے 6 لوگ انتقال کرگئے صوبے میں اموات کی مجموعی تعداد کے بارے میں انہوں نے کہا کہ اب تک 28 لوگ اس وائرس سے زندگی کی بازی ہار چکے ہیں جبکہ 919 لوگ ہمارے پاس زیر علاج ہیں۔ انہوں نے کہا کہ گزشتہ 24 گھنٹے اس مرض کے اعداد و شمار کے حساب سے کافی پریشان کن تھے اور یہ اچھی خبر نہیں ہے اور ہمیں مزید سخت لاک ڈاﺅن کی ضرورت ہے۔ دوسری جانب پاکستان پیپلز پارٹی کے چیئرمین بلاول بھٹو زرداری نے دعویٰ کیا ہے کہ وفاقی حکومت سست رفتاری سے کام کر رہی ہے برطانوی نشریاتی ادارے سے انٹرویو میں انہوں نے کہا کہ افسوس ہے کہ وفاقی حکومت کورونا سے نمٹنے کے لیے سست رفتاری سے کام کر رہی ہے صوبے اپنے اپنے طور پر کام کر رہے ہیں وفاقی حکومت سے صوبوں کو بہت کم مدد مل رہی ہے۔ انہوں نے کہا کہ کورونا وائرس اور لاک ڈاﺅن کا عوام پر بہت برا اثر ہوگا ’پاکستان کی اپوزیشن نے وفاقی حکومت کو مشترکہ کاوشوں کی پیشکش کی ہے‘بلاول بھٹو نے کہا کہ ’پاکستان میں صوبائی اور مقامی حکومتیں اپنے محدود وسائل کا استعمال کر کے اس وبا کا مقابلہ کر رہی ہیں۔ انہوں نے کہا کہ وسائل والے ممالک اور عالمی طاقتوں کو ٹیسٹنگ کٹس اور صحت کی سہولیات کی دنیا بھر میں منصفانہ تقسیم کرنا ہوگی۔
