وفاقی وزیر اطلاعات شبلی فراز کا کہنا ہے کہ جتنی بھی اچھی خبریں آرہی ہیں ، اپوزیشن کےلیے بری خبریں ہیں۔
حکومت کی دو سالہ کارکردگی پر بریفنگ دیتے ہوئے سینیٹر شبلی فراز نے کہا کہ اپوزیشن مایوسی اور افراتفری پھیلانے کا کام کر رہی ہے، مشکلات سے نکل آئے ہیں ،خوشحالی کا دور شروع ہو چکا ہے۔
وزرات مواصلات میں سادگی مہم پر عمل پیرا ہو ئے اور 75 کروڑ روپے کی بچت کی، مراد سعید
اس موقع پر وفاقی وزیر مواصلات مراد سعید نے کہا کہ وزارت مواصلات میں 12 ارب 56 کروڑ روپے کی ریکوری کی گئی۔
انہوں نے کہا کہ وزرات مواصلات میں سادگی مہم پر عمل پیرا ہو ئے اور 75 کروڑ روپے کی بچت کی، ہم نے الیکٹرانک بڈنگ اور ای بلنگ کا آغاز کیا۔
مراد سعید نے بتایا کہ نیشنل ہائی وے اتھارٹی (این ایچ اے) کا ریونیو 53 ارب سے بڑھ کر 103 ارب روپے پر چلا گیا ہے، کراچی ، کوئٹہ اور چمن شاہراہ کی فزیبلیٹی پر کام شروع ہو چکاہے۔
انہوں نے کہا کہ گزشتہ حکومت کا آخری دو سال میں کوئی پبلک پرائیویٹ منصوبہ نہ تھا، ای کامرس کے آغاز کے لیے 1500 چھوٹے بڑے برانڈز سے معاہدہ کیا،پوسٹل سروسز پر عوام کا اعتماد بڑھا ، ارجنٹ سروس شروع کی گئی، پوسٹل سروسز کا ریونیو 10 ارب روپے سے بڑھ کر 18 ارب ہو گیا۔
ان کا کہنا تھا کہ موٹر وے پولیس کے رسپانس ٹائم کو 7 منٹ سے کم کر کے 2 منٹ پر لا رہے ہیں۔
عمران خان نہ کھاتا ہے اور نہ کھانے دیتا ہے ، فواد چوہدری
اس موقع پر وفاقی وزیر برائے سائنس و ٹیکنالوجی فواد چوہدری نے کہا کہ عمران خان نے کرپشن ختم کی ، عمران خان نہ کھاتا ہے اور نہ کھانے دیتا ہے ، یہاں بیٹھے وزراء پر کرپشن کا کوئی داغ نہیں۔
فواد چوہدری نے مزید کہا کہ عمران خان احتساب کویقینی بنانے کےلیے پرعزم ہیں، اس وقت ہم ماہانہ 250 وینٹی لیٹرز بنا رہے ہیں، ہم نے سائنس و ٹیکنالوجی کا بجٹ بڑھایا۔
انہوں نے کہا کہ مارچ کے پہلے ہفتے میں پاکستان میں سینیٹائزر کی قلت ہوگئی تھی، پاکستان جلد وینٹی لیٹرز برآمد کرنا شروع کر دے گا، ہم زرعی فارمز کو ٹیکنالوجی فراہم کریں گے، پاکستان رواں سال ڈائیلاسز مشین بھی بنانا شروع کرے گا۔
فواد چوہدری نے کہا کہ ایک سال میں سرجیکل آلات کی برآمدات 2 ارب ڈالر تک لے جانے کا ہدف ہے۔
