وزیراعظم عمران خان کا کہنا ہے کہ معیشت اوپر اٹھانے کے لیے نوجوانوں کو اسٹیک ہولڈر بنانا ہوگا، نوجوانوں کو ہر وہ سہولت دیں گے جس سے وہ روزگار کے مواقع حاصل کریں۔
اسلام آباد میں مشیر خزانہ حفیظ شیخ اور معاون خصوصی برائے امور نوجوانان عثمان ڈار نے وزیراعظم سے ملاقات کی اور کامیاب جوان پروگرام کے تازہ ترین اعداد وشمار پر بریفنگ دی۔
وزیراعظم کو بتایا گیا کہ چند دنوں میں 30 ہزار سے زائد نوجوانوں نے 53 ارب روپے سے زائد رقم کے حصول کے لیے درخواستیں دی ہیں اور اب تک ایک ارب روپے کی رقم نوجوانوں میں تقسیم کی جاچکی ہے۔
مشیر خزانہ حفیظ شیخ کا کہنا تھا کہ کامیاب جوان پروگرام کا دائرہ کار پہلے سے وسیع کر دیا گیا ہے،نوجوانوں کے لیے آسان شرائط پر رقم کے حصول کا شاندار موقع ہے۔
ذرائع کے مطابق وزیراعظم عمران خان نے پروگرام میں اب تک کی پیش رفت پر اطمینان کا اظہار کیا۔
وزیراعظم نےکامیاب جوان پروگرام کے دوران رقم کی تقسیم کے عمل پر مکمل نظر رکھنے کی ہدایت کرتے ہوئے کہا کہ شفافیت اور میرٹ پر کسی سطح پر بھی سمجھوتا نہیں ہونا چاہیے۔
ان کا کہنا تھا کہ معیشت اوپر اٹھانے کے لیے نوجوانوں کو اسٹیک ہولڈر بنانا ہوگا، رقم کی تقسیم کا عمل مزید تیز اور شفاف انداز میں مکمل کیا جائے۔
وزیراعظم نے مزیدکہا کہ کورونا کے ملکی معیشت پر منفی اثرات ختم کرنے کے لیے یہ پروگرام بہت ضروری ہے، نوجوانوں کو ہر وہ سہولت دیں گے جس سے وہ روزگار کے مواقع حاصل کریں۔
