لاہور : وزیر اعلیٰ عثمان بزدار نے کہا ہے کہ مخالفین کی کوئی سازشی تھیوری کامیاب نہیں ہوگی، مخالفین منفی سیاست سے ترقی و خوشحالی کے سفر کو روکنا چاہتے ہیں۔
وزیر اعلیٰ پنجاب سردار عثمان بزدار نے سیاسی مخالفین کو تنقید کا نشانہ بناتے ہوئے ان خیالات کا اظہار کیا، انہوں نے کہا کہ وزیراعظم عمران خان کی قیادت میں سابق حکومتوں کی خرابیوں کو درست کررہے ہیں۔
الحمداللہ ہمارا دامن صاف ہے، غلط کام کیا نہ کسی کو کرنے دیں گے، دو سال میں کرپشن کا کوئی اسکینڈل سامنے نہ آنا پی ٹی آئی حکومت کا کریڈٹ ہے۔
ان کا کہنا تھا کہ تنقید کی پرواہ کیے بغیر عوامی خدمت کا سفر جاری رکھیں گے اور الزامات کی منفی سیاست کرنے والوں کو ناکامی کا سامنا کرنا پڑے گا۔
وزیر اعلیٰ پنجاب کا مزید کہنا تھا کہ واویلا مچانے والوں کا کوئی مستقبل نہیں، منظم پروپیگنڈے کا جواب کارکردگی سے دیں گے۔
