وزیر خارجہ شاہ محمود قریشی کا کہنا ہے کہ پاکستان تحریک انصاف الحمدللہ سب سے بڑی سیاسی و پارلیمانی قوت کے طور پر ابھر کر سامنے آئی ہے۔
تفصیلات کے مطابق چیئر مین شاہ محمود قریشی کی زیر صدارت پاکستان تحریک انصاف کی مصالحتی کمیٹی برائے پارلیمنٹیرینز کا دوسرا اجلاس ہوا۔
اجلاس میں وفاقی وزیر تعلیم شفقت محمود، وزیر امور کشمیر علی امین گنڈاپور، ڈپٹی اسپیکر قومی اسمبلی قاسم خان سوری اور تحریک انصاف کے سینئر مرکزی نائب صدر ارشد داد شریک ہوئے۔
دوران اجلاس اراکین پارلیمان اور جماعتی قیادت کے مابین روابط کار کو مؤثر بنانے کے لیے مختلف تجاویز کو زیر غور لایا گیا۔
اس موقع پر وزیر خارجہ و چیئرمین مصالحتی کمیٹی برائے پارلیمنٹیرینز شاہ محمود قریشی نے کہا کہ سیاسی و حکومتی پالیسی و فیصلہ سازی میں جماعت و پارلیمانی نمائندگان کی آراء ہمارے لیے بہت اہمیت کی حامل ہیں ۔
شاہ محمود قریشی نے کہا کہ پاکستان تحریک انصاف الحمدللہ سب سے بڑی سیاسی و پارلیمانی قوت کے طور پر ابھر کر سامنے آئی ہے۔
ان کا کہنا تھا کہ وزیراعظم عمران خان کے ویژن کی روشنی میں جماعت کو ملک بھر میں منظم اور مستحکم بنانے کے لیے اہم اقدامات اٹھا رہے ہیں۔
چیئرمین مصالحتی کمیٹی برائے پارلیمنٹیرینز نے کہا کہ تحریک انصاف کے منشور کی روشنی میں جماعتی و حکومتی سطح پر جامع حکمت عملی وضع کرنا ہماری اولین ترجیحات میں شامل ہے۔
شاہ محمود قریشی کا کہنا تھا کہ کمیٹی کے ابتدائی اجلاس میں طے کیے گئے لائحہ عمل کے مطابق،معزز اراکین کمیٹی کی جانب سے بہت عمدہ تجاویز سامنے آئیں جن پر سیر حاصل گفتگو ہوئی ہے۔
انہوں نے کہا کہ وزیر اعظم عمران خان کی قیادت میں تمام توانائیاں بروئے کار لا کر منظم طریقے سے اپنے اہداف کے حصول کے لیے پرعزم ہیں ۔
واضح رہے کہ تحریک انصاف کی کمیٹی برائے پارلیمنٹیرینز کے قیام کا مقصد پارٹی کے نظم و ضبط کو قائم رکھتے ہوئے اراکین کی شکایات کا بروقت ازالہ کرنا اور پارٹی احداف کے حصول کے لیے باہمی روابط کے فروغ کو یقینی بنانا شامل ہے۔
