محمد سجیب حسین انڈر 19 ورلڈ کپ 2018ء میں بنگلہ دیش کی نمائندگی کرچکے، گزشتہ 2 سال سے پروفیشنل کرکٹ سے دور تھے
راج شاہی (ویب ڈیسک ) بنگلہ دیش کے سابق انڈر 19 کرکٹر محمد سجیب حسین نے پروفیشنل کرکٹ نہ کھیلنے کے مواقع نہ ملنے کے باعث مبینہ طور پر خودکشی کرلی۔ 2018ء انڈر 19 ورلڈ کپ میں ملک کی نمائندگی کرنے والے 21 سالہ محمد سجیب حسین کی لاش درگاپور میں ان کے کمرے میں پنکھے سے لٹکی پائی گئی۔ بنگلہ دیشی میڈیا کے مطابق اتوار کی صبح وہ دیر تک بیدار نہ ہوئے تو ان کے والد نے کمرے میں جھانکا جہاں وہ پنکھے سے لٹکے ہوئے دکھائی دیے۔
ان کی اطلاع پر پولیس نے دروازہ توڑ کر ان کی لاش باہر نکالی، مقامی پولیس نے سجیب حسین کی موت کو خودکشی کا کیس قرار دے کر تحقیقات شروع کردی ہیں۔ سجیب حسین نے 2018ء میں لسٹ اے کیریئر کا آغاز کیا تھا اور 3 میچز میں 5 کی اوسط سے 10 رنز بنائے تاہم 2018ء سے انہیں پروفیشنل کرکٹ کھیلنے کا موقع نہیں ملا تھا ۔ سوزیب آئندہ بنگہ بندھو ٹی 20 کپ کے ڈرافٹس کا حصہ نہیں تھے اور بنگلہ دیشی کرکٹ بورڈ کے گیمز ڈیویلپمنٹ منیجر ابو انعام محمد کے کا کہنا تھا کہ ان کے خیال میں ٹورنامنٹ سے باہر رہ جانے کی وجہ سے سجیب حسین ایسا انتہائی اقدام اٹھانے پر مجبور ہوئے ہوں گے ۔
