ٹینس اسٹار ثانیہ مرزا نے انکشاف کیا ہے کہ وہ بھی کرونا وائرس کا شکار ہوگئی تھیں۔ بھارتی ٹینس اسٹار اور پاکستانی کرکٹ شعیب ملک کی اہلیہ نے اپنے ٹویٹر پیغام میں مداحوں کو بتایا کہ وہ اب بالکل ٹھیک اور صحت مند ہیں۔
قومی کرکٹر شعیب ملک کی اہلیہ ثانیہ مرزا نے اپنے ٹوئٹر پیغام میں کرونا وائرس کا شکار ہونے سے متعلق آگاہ کیا، انہوں نے کہا کہ وہ رواں سال کے آغاز پر کرونا وائرس سے گزرنے کا تجربہ اپنے فالورز کے ساتھ شیئر کرنا چاہتی ہیں۔
ثانیہ مرزا نے بتایا کہ ان میں وائرس کی کوئی خاص علامات موجود نہیں تھیں لیکن پھر بھی انہوں نے خود کو الگ تھلگ رکھا، اس دوران سب سے مشکل مرحلہ اپنے 2 سالہ بچے اور اہل خانہ سے دوری تھا۔
ٹینس اسٹار کا کہنا ہے کہ وہ سوچ بھی نہیں سکتیں کہ فیملیز کن حالات سے گزرتی ہیں جب گھر کا کوئی فرد الگ تھلگ اسپتال میں داخل ہو۔
ثانیہ مرزا نے کرونا وائرس سے گزرنے کے تجربے کو خوفناک قرار دیتے ہوئے کہا کہ ایک بے یقینی کی صورتحال تھی، جب ہر روز وائرس کی نئی علامت سامنے آرہی ہو تو اگلے لمحے کیا توقع کی جاسکتی ہے، اس بے یقینی کی صورتحال سے نمٹنا نا صرف جذباتی بلکہ دماغی اور جسمانی طور پر بھی انتہائی مشکل تھا۔
ان کا کہنا ہے کہ وہ خود کو خوش قسمت سمجھتی ہیں کہ کرونا وائرس سے صحتیاب ہوگئی ہیں، وائرس کوئی مذاق نہیں ہے، تمام تر حفاظتی تدابیر اپنانے کے بعد بھی میں اس کا شکار ہوگئی۔
ثانیہ مرزا نے اپنے فالوورز کو ماسک پہننے اور ہاتھ دھونے کی تلقین کی تاکہ خود کو اور اپنے اہلخانہ کو اس مہلکت وائرس سے محفوظ رکھا جاسکے
