وزیراعظم عمران خان کے معاون خصوصی برائے سیاسی ابلاغ ڈاکٹر شہباز گِل کا کہنا ہے کہ نااہل لیگ کا چیف ایگزیکٹو جرمنی جاتے ہوئے پی آئی اے جہاز ساتھ لے گیا تھا۔
احسن اقبال کے بیان پر ردعمل دیتے ہوئے ڈاکٹر شہباز گِل کا کہنا تھا کہ قومی جہازوں کو فلم شوٹنگز اور سکریپ میں بیچنے والے نوٹنکی میڈیا پر لیکچر دے رہے ہیں، نااہل لیگ کا چیف ایگزیکٹو جرمنی جاتے ہوئے پی آئی اے جہاز ساتھ لے گیا تھا، 2 سال بعد غائب جہاز کا پتہ تحقیقات کے بعد تب لگا جب جہاز جرمنی پہنچ گیا تھا، مسقط ایئرپورٹ پر پی آئی اے جہاز لاوارث چھوڑ دینے والے اپنا ماضی دیکھ لیں۔
انہوں نے کہا کہ براڈشیٹ معاملے پر ایک بار پھر لیگی پٹواری مٹھائی کھا کر الٹی کر رہے ہیں، لگتا ہے ارسطو صاحب نے بھی برطانوی کورٹ کے فیصلے کا اردو ترجمہ پڑھ لیا ہے، دو ہفتے سے براڈشیٹ کا نام لیکر اچھل کود کرنے والے اسے لطیفہ کہہ رہے ہیں۔
شہباز گل کا مزید کہنا تھا کہ “عزت اور ساکھ” جیسے الفاظ نااہل لیگ کو بلکل نہیں ججھتے، مہینے میں 4 بار ہارٹ اٹیک اور 15 جھوٹی بیماریوں میں مبتلا ہوکر ملک سے بھاگنے والے عزت کی بات نہ کریں، جس کابینہ کا وزیراعظم سمیت وزیر خارجہ و داخلہ بیرون ملک اقامہ پر مالی چپڑاسی ہوں ان کو ساکھ کا کیا پتہ؟ آلِ شریف اور درباری لوٹ مار میں بین الاقوامی سطح پر مشہور اور ملک کی بدنامی کا باعث بنے۔
