وزیر خارجہ مخدوم شاہ محمود قریشی نے منتخب پاکستانی امریکیوں کے ساتھ ورچوئل میٹنگ کی ہے ، اس میڈنگ میں امریکہ میں تعینات پاکستانی سفیر اسد مجید بھی ورچول رابطے کے ذریعے موقعے پر موجود تھے۔
اجلاس میں منتخب پاکستانی امریکین کونسل ، سٹی میرز اور ڈپٹی میرز نے بھی بذریعہ ویڈیو لنک شرکت کی ہے۔
شاہ محمود قریشی کا کہنا ہے کہ میں مصروفیات کے باوجود آپ کی شرکت کا شکر گزار ہوں ، آپ نے جس طرح اپنی محنت اور لگن سے یہ کامیابی حاصل کی ہے وہ قابل تحسین ہے۔
ان کا کہنا تھا کہ مجھے بطور وزیر خارجہ پاکستانی امریکیوں کی کامیابیوں پر ہمیشہ فخر محسوس ہوتا ہے، میں بیرون ملک مقیم پاکستانیوں کے ساتھ رابطے میں بھی رہتا ہوں۔
وزیرخارجہ کا مزید کہنا تھا کہ بیرون ملک مقیم پاکستانی اپنی اپنی کمیونٹیز میں گرانقدر خدمات سرانجام دے رہے ہیں جبکہ اس سال تاریخ میں سب سے زیادہ ترسیل زر دیکھنے میں آئی ہے جس کا سہرا بیرون ملک مقیم پاکستانیوں کے سر جاتا ہے۔
پاکستانی امریکن کمیونٹی وزیراعظم عمران خان کے دل کے بہت قریب ہے۔
میٹنگ میں ان کہا کہنا تھا کہ عمران خان وزارتِ عظمیٰ کا منصب سنبھالنے سے قبل جب ایک عام پاکستانی کے طور پر فنڈ ریزنگ کیلئے پاکستانی امریکن کے پاس گئے تو ان کو بہت پذیرائی ملی تھی ، ہمیں یہ دیکھ کر بہت خوشی ہوتی ہے کہ آج بہت سے برطانوی پاکستانی برطانوی پارلیمنٹ کا حصہ ہیں۔
انہوں نے یہ بھی کہا کہ مسئلہ کشمیر کو اجاگر کرنے میں برطانوی اور امریکی پاکستانیوں نے قابلِ ستائش کردار ادا کیا ، میں نے امریکہ اور کینیڈا میں بہت سے پاکستانیوں کو سیاسی نظام کا حصہ بنتے دیکھا ہے۔
ہم آپ کو ووٹ کا حق دے کر پاکستان کے سیاسی نظام اور فیصلہ سازی میں حصہ دار بنانا چاہتے ہیں۔
شاہ محمود قریشی کا کہنا تھا کہ ہم چاہتے ہیں کہ دوہری شہریت کے حامل افراد کو پاکستان میں الیکشن میں حصہ لینے کا اہل بنایا جائے ، ہمارے مشرقی ہمسائے کی نسبت پاکستان نے کورونا کی تیسری لہر کا بہتر حکمت عملی سمارٹ لاک ڈاؤن کے ذریعے مقابلہ کیا ہے۔
ان کا کہنا تھا کہ آپ کو یہ جان کر خوشی ہو گی کہ ہم نے اپنی معیشت کو نہ صرف سہارا دیا ہے بلکہ اس مرتبہ ہم گروتھ کی جانب رواں دواں ہیں ، ہم جغرافیائی سیاسی ترجیحات کو جغرافیائی اقتصادی ترجیحات میں تبدیل کر رہے ہیں۔
وزیر خارجہ نے مزید بتایا کہ ہم امریکہ کے ساتھ تعلقات کو کثیرالجہتی اقتصادی شعبہ جات میں مستحکم بنانے کے متمنی ہیں، ہماری 60 فیصد آبادی نوجوانوں پر مشتمل ہے۔
ہم انفارمیشن ٹیکنالوجی، انفراسٹرکچر، گرین انرجی، صحت، تعلیم اور زراعت سمیت مختلف شعبوں میں امریکہ کے ساتھ دو طرفہ تعلقات کے فروغ کے متمنی ہیں۔
شاہ محمود قریشی نے میٹنگ میں مکہا کہ ہم ٹیکنالوجی کے تبادلے سے اپنی زراعت کو مزید بہتر بنا سکتے ہیںاور اپنی پیداوار میں کئی گنا اضافہ بھی کر سکتے ہیں۔
ہم نے بیرون ملک مقیم پاکستانیوں اور سیاحوں کیلئے ای ویزہ رجیم کو متعارف کروایا ہے۔
ان کا کہنا تھا کہ میں آپ کو ان اقدامات سے آگاہ کرنا چاہتا ہوں جو ہماری حکومت نے بیرون ملک مقیم پاکستانیوں کی سہولت کیلئے اٹھائے ہیں۔
بیرون ملک مقیم پاکستانی اپنی شکایات کے ازالے کیلئے وزیراعظم پورٹل کو استعمال بھی کر سکتے ہیں ، اس کے علاوہ بیرون ملک مقیم پاکستانیوں کی شکایات کے ازالے کیلئے وزارتِ خارجہ میں ایف ایم پورٹل بھی قائم کیا جا رہا ہے۔
میری ہدایت پر، پاکستانی سفارتخانے بھی باقاعدگی کے ساتھ ای – کچہریوں اور ٹاؤن ہال میٹنگز منعقد کر رہے ہیں۔
شاہ محمود قریشی نے یہ بھی کہا کہ ہم اقتصادی ترقی کیلئے خطے میں امن چاہتے ہیں۔
انہوں نے بتایا کہ ہم اگلے دس سالوں میں دس ڈیم بنانے کا ارادہ رکھتے ہیں متبادل توانائی ، ہایڈل توانائی منصوبوں پر کام کر رہے ہیں۔
ہائیڈل توانائی سے 50 ہزار میگاواٹ بجلی پیدا ہو سکے گی۔
وزیر خارجہ نے یہ بھی کہا کہ میں رواں سال ستمبر میں اقوامِ متحدہ جنرل اسمبلی کے اجلاس میں شرکت کا ارادہ رکھتا ہوں اس موقع پر میں امریکہ میں ہمارے تمام قونصلیٹ جانے کا ارادہ رکھتا ہوں تاکہ آپ سے براہ راست مل سکوں۔
آپ کی محنت اور ترقی دوسرے پاکستانیوں کیلئے مشعل راہ ہے۔
