وزیر مملکت فرخ حبیب نے کہا کہ مریم صفدر سرٹیفائیڈ جھوٹی ہے اورجھوٹ بنانے والی فیکٹری چلا رہی ہے۔
تفصیلات کے مطابق وزیر مملکت فرخ حبیب نے مریم صفدر کے بیان پر ردعمل دیتے ہوئے کہا کہ اگر رگوں میں کشمیری خون ہوتا تو شادی پر مودی کے بجائے حریت قیادت کو مدعو کرتے اور انہیں عزت دیتے۔
انہوں نے کہا کہ نواز شریف کا پورا ٹبر بھگوڑا اور بیٹی سزا یافتہ ہے ، ایسے اعزازات کم ہی کسی خاندان کو حاصل ہوتے ہیں ، اس وقت تو بلڈ سیل سٹاک ایکسچینج کی طرح اوپر نیچے ہورہے تھے اور جیسے ہی نواز شریف لندن پہنچے تو ٹھیک ٹھاک ہوگئے۔
وزیر مملکت نے کہا کہ نواز شریف نے علاج کے لیے ایک انجکشن بھی نہیں لگوایا، لندن میں پولو میچ، پرتعیش کھانوں سے محظوظ ہورہے ہیں ، نواز شریف لندن میں بیٹھ کر الطاف حسین ٹو بن کر مودی کے بیانیے کو آگے بڑھا رہے ہیں،پاکستان میں یہ خدمات مریم کے سپرد ہیں۔
فرخ حبیب نے کہا کہ گلگت بلتستان کی عوام کی طرح آزاد جموں و کشمیر کی عوام بھی انہیں 25جولائی کوعبرت ناک شکست دے گی ، پاکستان کی 22کروڑعوام میں سے اگر کسی کو مودی کی بھتیجی ہونے کا اعزاز حاصل ہے تو وہ مریم صفدر ہے۔
انہوں نے کہا کہ مودی کی حلف برداری پر بھنگڑے ڈالتے ہوئے نواز شریف ہندوستان گئے تھے ، اوفا مشترکہ اعلامیہ سے کشمیر کا ذکر نکلال کر نواز شریف نے مودی کیساتھ کشمیر کا سودا کیا تھا ، مریم بتائے نواز شریف مودی کی یاری میں اتنے دیوانے کیوں ہوگئے تھے کہ بھارتی جاسوس کلبھوشن یادو کا نام نہیں لیتے تھے۔
وزیر مملکت فرخ حبیب نے کہا کہ عمران خان کشمیریوں کے دلیر اور سچے وکیل ہیں ، عمران خان نے اقوام متحدہ، ٹرمپ سے ملاقات، او آئی سی سمیت ہر فورم پر کشمیریوں کا مقدمہ لڑا ہے ، مریم صفدر، نواز شریف کی کرپشن کی حقیقی وارث ہیں ان کی پرورش بھی کرپشن کے پیسوں سے ہوئی ہے۔
