راولپنڈی: پاک فوج کے سربراہان اجلاس میں خطے کی مجموعی صورتحال پر غور کیا گیا۔
پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف اسٹاف کی زیرصدارت مسلح افواج کے سربراہان کا اجلاس ہوا۔ جس میں آرمی چیف جنرل قمر جاوید باجوہ سمیت تینوں مسلح افواج کے سربراہان شریک ہوئے۔
اجلاس میں سیکیورٹی امور سمیت اسٹریٹجک اور روایتی پالیسیوں کے امور پر گفتگو کی گئی جبکہ اجلاس میں خطے بلخصوص افغانستان کی تازہ صورتحال پر بھی غور کیا گیا۔
آئی ایس پی آر کے مطابق درپیش چیلنجز اور ان سے نبرد آزما ہونے کے لیے مسلح افواج کے پلان پر بھی غور کیا گیا جبکہ تیزی سے بدلتی صورتحال اور پیشرفت کے تناظر میں روایتی پالیسیوں پر بھی بات چیت ہوئی۔
