پنجاب اسمبلی میں خلیفہ اوّل حضرت سیدنا ابوبکر صدیق رضی اللہُ تعالیٰ عنہُ کے یومِ وفات کو سرکاری سطح پر منانے کی قرارداد متفقہ طور پر منظور کر لی گئی ہے۔
منگل کو ہونے والے اجلاس میں پنجاب اسمبلی کے رکن معاویہ اعظم طارق نے مذکورہ قرارداد ایوان میں پیش کی۔
قرارداد کے متن میں کہا گیا کہ پاکستان کا وجود کلمہ طیبہ کی بنیاد پر رکھا گیا ہے۔
خیال رہے کہ حضرت ابوبکر صدیقؓ کا یومِ وفات 22 جمادی الثانی کو ملک بھر میں انتہائی عقیدت و احترام سے منایا جاتا ہے۔
اس سلسلہ میں مختلف تنظیموں اور جماعتوں کی جانب سے اجتماعات اور ریلیوں کا انعقاد بھی کیا جاتا ہے۔
مقررین سیدنا حضرت ابوبکر صدیقؓ کے فضائل و مناقب، سیرت اور کردار و کارناموں پر روشنی ڈالتے ہیں اور آپؓ کو زبردست خراج عقیدت پیش کیا جاتا ہے۔
دوسری جانب پنجاب اسمبلی نے محکمہ کوآپریٹنگ ہاوسنگ کے رہائشی کے مسائل کے خلاف تحریک التوا کار منظور کر لی ہے۔
تحریک التوا کے متن میں کہا گیا کہ محکمہ کوآپریٹنگ ہاوسنگ سوسائٹیز کے لیے موثر اقدمات کرے ۔
آج ہونے والے اجلاس میں اسمبلی نے کم پیمانہ اور ملاوٹ شدہ پیٹرول کی فروخت کے خلاف بھی قرارداد متفقہ طور پر منظور کر لی۔
قرارداد مسلم لیگ (ن) کے رکن اسمبلی مرزا جاوید نے ایوان میں پیش کی تھی۔
پنجاب اسمبلی کے اجلاس کا ایجنڈا مکمل ہونے پر پینل آف چئیرمین نے اجلاس غیر معینہ مدت کے لیے ملتوی کر دیا۔
