پاکستان پیپلز پارٹی کے ترجمان فیصل کریم کنڈی نے کہا ہے کہ ایسا لگ رہا ہے کہ اس ملک میں بجلی اور گیس ہے ہی نہیں۔
فیصل کریم کنڈی نے پریس کانفرنس کرتے ہوئے کہا کہ حکومت نے قومی سلامتی پالیسی کو چھپا کر رکھا ہے۔
ان کا کہنا تھا کہ عوام پر منی بجٹ نازل کیا جا رہا ہے، حکومت نے ملک کی جو حالت کی ہے سب کے سامنے ہے۔
پی پی پی کے ترجمان کا کہنا تھا کہ حکومت خیبر پختونخواہ میں امن و امان قائم رکھنے میں ناکام ہو گئی ہے پر اب کے پی میں تبدیلی کا سورج طلوع ہو چکا ہے۔
فیصل کنڈی نے کہا کہ پیپلز پارٹی کی ماضی کے مقابلے میں اچھی کارکردگی رہی، بلدیاتی انتخابات میں پیپلز پارٹی کی کارکردگی پہلے سے بہتر ہو گی۔
ان کا کہنا تھا کہ ماضی میں جس جس چیز کا عمران خان نے نوٹس لیا اس کا بیڑہ تباہ ہو گیا۔ عمران خان خود کہتے تھے کہ مہنگائی ہو تو وزیر اعظم چور ہوتا ہے، آج ملک میں اتنی زیادہ مہنگائی ہے تو کون چور ہے؟
پی پی پی کے ترجمان فیصل کریم کنڈی نے مزید کہا کہ وزیر اعظم کو اپنے ملک سے زیادہ یورپ اور مغرب کے بارے میں پتا ہے۔ ملک میں مہنگائی سے تنگ لوگ خودکشیاں کر رہے ہیں، حکمرانوں کو علم ہی نہیں ہے کہ ملک میں کتنی مہنگائی ہے۔
