دنیا بھر میں کرونا کے نئے ویرینٹ کی وجہ سے وبا کے پھیلاؤ میں مزید تیزی آئی ہے جس کے باعث امریکہ، برطانیہ، فرانس اور آسٹریلیا میں کورونا کے ریکارڈ کیسز سامنے آئے ہیں۔
فرانسیسی خبر رساں ادارے ‘اے ایف پی ‘ کی رپورٹ کے مطابق عالمی ادارہ صحت(ڈبلیو ایچ او) نے خبردار کیا ہے کہ تیزی سے بڑھتے اومی کرون کے کیسز سے وائرس کے مزید نئے اور خطرناک ویریئنٹس سامنے آنے کے خدشات بڑھ گئے ہیں۔
منگل کو برطانیہ میں پہلی بار یومیہ کیسز کی تعداد دو لاکھ سے تجاوز کر گئی، آسٹریلیا میں 50 ہزار جب کہ فرانس میں دو لاکھ 70 ہزار سے زائد کیسز رپورٹ ہوئے ہیں جو ایک ریکارڈ تعداد ہے۔
یہ انتہائی بلند اعداد و شمار امریکہ میں پیر کے روز سامنے آنے والے کیسز کی تعداد کے مقابلے میں بہت کم ہیں کیونکہ 3 جنوری کو 10 لاکھ 80 ہزار 211 کیسز رپورٹ ہوئے جو کہ ایک عالمی ریکارڈ ہے۔
تیزی سے ساخت تبدیل کرنے والا اومی کرون ویرینٹ اس وقت کرونا کی سب سے تیزی سے پھیلنے والی قسم ہے اور امریکہ میں سال کے آخر میں رپورٹ ہونے والے کیسز کے 59 فیصد کی وجہ یہی ہے۔
دنیا بھر میں اومی کرون کے باعث اموات اور ہسپتال میں داخل ہونے والے مریضوں کی کم شرح کے باعث یہ امید ظاہر کی جا رہی تھی کہ وئرس موسمی بیماری میں تبدیل ہو سکتا ہے تاہم عالمی ادارہ صحت نے خبردار کیا ہے کہ صورت حال اس کے برعکس ہے۔
عالمی ادارہ صحت کی سینئر ایمرجنسیز آفسیر کیتھرائن اسمال وڈ نے بتایا کہ ‘اومی کرون جتنا زیادہ پھیلتا ہے اتنی ہی تیزی سے شکل تبدیل کرتا جاتا ہے، جس سے عین ممکن ہے کہ کوئی نیا ویرینٹ سامنے آ جائے’۔
ان کا مزید کہنا تھا کہ ’اب اومی کرون مہلک ہو رہا ہے، یہ اموات کا باعث بن سکتاہے جو ڈیلٹا کے مقابلے میں شاید کم ہوں، لیکن نجانے اگلی قسم کیا کچھ کرے۔‘
اس وقت برطانوی حکومت کی جانب سے کہا گیا ہے کہ ہسپتالوں میں عملےکی کمی کے باعث ہنگامی صورت حال نافذ کر دی گئی ہے۔
برطانیہ میں 24 گھنٹے کے دوران دو لاکھ 18 ہزار 724 کیسز سامنے آنے کے بعد وزیراعظم بورس جانسن نے عزم ظاہر کیا کہ خراب صورت حال والے علاقوں میں فوج اور طبی رضاکاروں کی مدد سے عملے کی کمی کو پورا کیا جائے گا۔
علاوہ ازیں آسٹریلیا جس نے کامیابی سے کیسز پر قابو پا لیا تھا وہاں بھی ایک روز میں 47 ہزار سات سو 38 کیسز کا پچھلا ریکارڈ ٹوٹ گیا ہے۔
