پاکستان یا پاکستان جیسے ممالک میں پیسہ کمانے کے لالچ میں لوگ اپنی جمع پونجی گنوا بیٹھے ہیں۔ اسکی بنیادی وجہ یہ ہے کہ ہم میں سے اکثریت راتوں رات امیر ہونے کے چکر میں ہیں اور کوئی ایسا آسان اور سہل کاروبار کرنا چاہتے ہیں جس میں محنت بہت کم ہو اورآمدن زیادہ۔ اسی لالچ کا فائدہ اٹھا کر دنیا بھر میں ایسے فراڈ ادارے یا کمپنیاں کام کر رہی ہیں جو لوگوں کے لالچ کا فائدہ اٹھا کر لوگوں کی عمر بھر کی جمع پونجی بٹور لیتے ہیں اور سرمایہ کاری کرنے والوں کو پچھتاوے کے سوا کچھ نہیں ملتا۔ سوال یہ ہے کہ کیا کرپٹو کرنسی بھی ایسا ہی کوئی آن لائن کاروبار ہے؟ سٹیٹ بینک نے 2018 ءمیں کرپٹو کرنسی پر پابندی لگا دی تھی اس کے باوجود لوگ رسک لے رہے ہیں۔ پاکستان کا شمار ان 15 ممالک میں ہوتا ہے جنہوں نے کرپٹو کرنسی کا انتخاب کیا ہے۔ اب تک جو اعدادوشمار سامنے آئے ہیں اس کے مطابق پاکستانیوں نے پرکشش منافع کے لالچ میں 20 ملین ڈالر سرمایہ کاری کر رکھی ہے۔ جبکہ پاکستانی بینکوں نے 100 اکاﺅنٹس کو کرپٹو استعمال کرنے کی وجہ سے بند کر دیا تھا۔
