تنازعات پر عالمی ثالثی عدالت کا پی سی بی کے حق میں فیصلہ

لاہور: (ویب ڈیسک) پاکستان کرکٹ بورڈ نے بڑی کامیابی حاصل کرلی اور لندن کی عالمی ثالثی عدالت نے پی سی بی کے حق میں فیصلہ دے دیا ہے۔
پاکستان کرکٹ بورڈ کے مطابق ٹیک فرنٹ ایف زیڈ ای اور بلٹز ایڈورٹائزنگ پرائیوٹ لمیٹڈ کی پی سی بی کے ساتھ تنازعات پر لندن کی عالمی ثالثی عدالت نے پی سی بی کے حق میں فیصلے سنادئیے ہیں۔
ٹیک فرنٹ انٹرنیشنل ایف زیڈ ای (ٹیک فرنٹ)سے متعلق تنازع پاکستان سپر لیگ کے براڈکاسٹ اور لائیو سٹریمنگ میڈیا رائٹس کے معاہدوں کے سلسلے میں فیس کی ادائیگی جبکہ بلٹز ایڈورٹائزنگ کے ساتھ تنازع پی ایس ایل 2020 کے میچز کی تاخیر سے ٹیلی ویژن نشریات اور لائیو سٹریمنگ میڈیا رائٹس کی فیس کی ادائیگی سے متعلق تھا۔
ان تنازعات پر لندن کی عالمی ثالثی عدالت نے ٹیک فرنٹ اور بلٹز ایڈورٹائزنگ کے دعوؤں کو مسترد کرتے ہوئے دونوں پارٹیز کو پی سی بی کو فیس کی ادائیگی اور کیس سے متعلق تمام اخراجات اٹھانے کا حکم دیا ہے، یہ تمام حقوق پاکستان اور لندن کی عالمی ثالثی عدالت کے قوانین کے عین مطابق جاری کیے گئے۔
پاکستان کرکٹ بورڈ کے چیف آپریٹنگ آفیسر بیرسٹر سلمان نصیر کا کہنا ہے کہ یہ ان کے لیے بڑی کامیابیاں ہیں کیونکہ اس سے پی سی بی کو پاکستان سپر لیگ سے کثیر آمدنی ملنے میں کامیابی ہوگی۔
انہوں نے کہا کہ اس فیصلے سے یہ بھی واضح ہوتا ہے کہ ہم مربوط معاہدے کرتے ہیں اور ہم پی ایس ایل کے برانڈ کی مقبولیت میں اضافے کے لیے ہر ممکن کوشش کرتے رہیں گے۔