پاکستان اورآسٹریلیا کے درمیان سیریز سنسنی خیز ہوگی، اظہرعلی

لاہور: (ویب ڈیسک) پاکستان کرکٹ ٹیم کے سابق کپتان اوربیٹراظہرعلی کا کہنا ہے کہ پاکستان اورآسٹریلیا کے درمیان سیریزسنسنی خیز ہوگی۔
آسٹریلیا کی کرکٹ ٹیم کے دورہ پاکستان سے قبل پاکستان کرکٹ ٹیم کے سابق کپتان اور بیٹر اظہرعلی پاکستان اور آسٹریلیا کے مقابلوں کی یادیں تازہ کرنے لگے۔
اظہرعلی کا کہنا تھا کہ وہ آسٹریلیا کے سابق کپتان اسٹیو واہ کی بیٹنگ سے بہت متاثر تھے۔ اسٹیووا کے بارے میں عام تاثر یہی تھا کہ وہ شارٹ پچ گیندوں کو اچھا نہیں کھیلتے مگر اس کے باوجود اپنے جسم پر باؤنسر ز کھاکر بھی لمبی اننگز کھیلا کرتے تھے۔
اظہر علی نے کہا کہ 90 کی دہائی میں پاکستان اور آسٹریلیا کی ٹیمیں دنیا کی 2 مضبوط ترین ٹیمیں سمجھی جاتی تھیں اور دنیا بھر کے شائقین کرکٹ ان دونوں ٹیموں کے درمیان کرکٹ مقابلے دیکھنے کے لیے بیتاب رہتے تھے۔
اظہرعلی کا کہنا تھا کہ وہ آسٹریلیا اور پاکستان کے اوقات کار کے طویل فرق کے باعث راتوں کو جاگ کر پاکستان اورآسٹریلیا کے مابین میچز دیکھا کرتے تھے۔ وہ ٹو ڈبلیوز (وسیم اکرم اور وقار یونس ) کی رکی پونٹنگ اور ایڈم گلکرسٹ کو کئے جانے والے یادگار بولنگ اسپیلز کے مداح رہے ہیں۔ شعیب اختر اور بریٹ لی کے مابین تیز ترین گیندیں پھینکنے کی جنگ انہیں آج بھی یاد ہے۔
اظہرعلی کے مطابق اس وقت پاکستان کی مضبوط بولنگ لائن اپ کے بارے میں مشہور تھا کہ یہ 150 رنز کا کامیابی سے دفاع کرنے کی بھی صلاحیت رکھتی ہے۔ کئی میچز میں وسیم اکرم اور وقار یونس نے شعیب اختر کی مدد سے آسٹریلیا کی مضبوط بیٹنگ لائن اپ کو تہس نہس کیا تھا۔ بیٹنگ میں سعید انور اور انضمام الحق پاکستان ٹیم کی ریڑھ کی ہڈی سمجھے جاتے تھے۔
اظہر علی نے کہا کہ آسٹریلیا کے سابق کپتان اور موجودہ بیٹر اسٹیو اسمتھ اور ان کے کرکٹ کیرئیر میں چند مماثلتیں ضرور ہیں مگر وہ جب بھی اسٹیو اسمتھ سے ملتے ہیں تو ان سے کرکٹ پر سیر حاصل گفتگو کرتے ہیں۔
انہوں نے مزید کہا کہ پاکستان اور آسٹریلیا کے مابین 4 مارچ سے راولپنڈی میں شروع ہونے والی سیریز سنسنی خیز ہوگی جہاں دو مضبوط ٹیموں کے ٹاکرے کو دیکھنے کے لیے شائقین کرکٹ کی بڑی تعداد اسٹیڈیم میں موجود ہوگی۔
پاکستان کے لئے 91 ٹیسٹ میچز کھیلنے والے اظہرعلی نے اب تک آسٹریلیا کے خلاف 11 ٹیسٹ میچز میں پاکستان کی نمائندگی کی ہے۔ گیارہ ٹیسٹ میچز کی22 اننگز میں اظہرعلی نے50 کی اوسط سے ایک ہزاررنزبنا رکھے ہیں۔
اظہرعلی نے آسٹریلیا کیخلاف 3 سینچریاں اور5 نصف سینچریاں اسکورکی ہیں۔ان کی 2016 میں ملیبرن میں کھیلے گئے باکسنگ ڈے ٹیسٹ میں ناقابل شکست 205 رنز کی اننگز نمایاں ہے۔