مانچسٹر: (ویب ڈیسک) اب اپارٹمنٹ اور فلیٹ پر فلموں کی تھیم پر بننے لگے ہیں۔ اس تناظر میں برطانیہ میں ایک بیٹ مین اپارٹمنٹ بنایا گیا ہے جو اندر سے غیرمعمولی طور پر سیاہ ہے جسے بیٹ مین فلم اور کامک کے گوتھم سٹی کی طرز پر بنایا گیا ہے۔
990 مربع فٹ وسیع یہ فلیٹ انگلینڈ کے شہر مانچسٹر میں واقع ہے جس کا اندرون مکمل طور پر سیاہ ہے اور اس کی قیمت چار لاکھ ساٹھ ہزار ڈالر رکھی گئی ہے جو بہت زیادہ بھی نہیں۔
اس کے دونوں بیڈروم مکمل طور پر سیاہ ہیں، فرنیچر بھی کالے ہیں اور اندر کی کئی اشیا کو بھی تاریک ہی رکھا گیا ہے۔ یہاں تک کہ واک ان شاور باتھ روم بھی سیاہ ہے تاہم نہانے کا ٹب، بیسن اور کموڈ سفید ہیں اور بقیہ دیواریں کالی ہیں۔
یہ عمارت سو سال پرانی ہے اور پہلے ایک گودام کے طور پر بیان کی گئی تھی پھر 1920 کے عشرے میں اسے فلیٹ میں بدلا گیا اب اسے مکمل طور پر سیاہ فلیٹ میں بدلا گیا ہے۔ اب یہ تیزی سے وائرل ہورہا ہے اور لوگ اس کی تصاویر شیئر کررہے ہیں۔ اگرچہ پہلے اس کی قیمت 5 لاکھ 22 ہزار ڈالر رکھی گئی تھی لیکن اب اس کی قیمت کم کرکے چار لاکھ ساٹھ ہزار ڈالر جو پاکستانی روپے میں 8 کروڑ 60 لاکھ ڈالر کےبرابر ہے۔
اسے فروخت کرنے والے اسٹیٹ ایجنٹ نے کہا ہے کہ فلیٹ کے مالک نے شعوری طور پر اسے بیٹ مین کا گھر بنایا ہے۔ اس کےلیے بہت سوچ سمجھ کر گھر کی سجاوٹ کی گئی ہے۔
بیٹ مین طرز کا سیاہ ترین اپارٹمنٹ، قیمت چار لاکھ ساٹھ ہزار ڈالر
