ٹوکیو: (ویب ڈیسک) پاکستان ہو یا جاپان، ہر جگہ چندے کی پیٹیوں پر ہاتھ صاف کرنے والے موجود ہوتے ہیں۔ اب جاپانی مندروں میں ایسے چوروں کو پکڑنے کے لیے مصنوعی ذہانت اور مشین لرننگ پر مبنی سافٹ ویئر بنائے گئے ہیں۔
وجہ یہ ہے کہ بعض جاپانی مندر 24 گھنٹے کھلے رہتے ہیں اور بسا اوقات لوگوں کی آمدورفت محدود اور اسٹاف نہ ہونے کے برابر ہوتا ہے۔ اب سی سی ٹی وی فوٹیج پر مشکوک افراد پر نظر رکھنے اور اس کی پیش گوئی کرنے والا ایک سافٹ ویئر بنایا گیا ہے۔
مصنوعی ذہانت کی بنا پر تیار پروگرام نوٹ کرتا ہے کہ کون چندہ پیٹی کے پاس رکا ہے، کون اس کے پیچھے جارہا ہے اور کون مشکوک حرکات میں ملوث ہے۔ یقین ہوجانے پر وہ اس کی تصاویر اور ویڈیو ایپ پر رجسٹر ہونے والے افراد کو فوری طور پر ارسال کردیتا ہے۔ ان میں مندر انتظامیہ، کمیٹی کے لوگ، پولیس اہلکار اور عام شہری بھی ہوسکتے ہیں۔
دو برس قبل کئی مندروں کی انتظامیہ نے سافٹ ویئر کمپنی سے رابطہ کیا تھا کہ وہ چندہ چوروں سے بہت پریشان ہیں کیونکہ لوگوں کی خطیر رقم چرالی جاتی ہے اور مجرم صاف بچ نکلتے ہیں۔ ناگویا میناٹو وارڈ میں واقع ایک مندر انتظامیہ نے بتایا کہ مختصر مدت میں چندے کے باکس کو بہت ہوشیاری سے لوٹا گیا ہے۔
کمپنی کا سافٹ ویئر ہر طرح کی سیکیورٹی کیمرے کے ساتھ کام کرسکتا ہے۔ اب جاپان بھر سے عبادت گاہوں کی انتظامیہ نے ان کے سافٹ ویئر میں دلچسپی کا اظہار کیا ہے۔
