بابر اعظم اور امام الحق کی جوڑی اہم سنگ میل کے قریب

لاہور: (ویب ڈیسک) قومی ٹیم کے کپتان بابر اعظم اور نوجوان اوپننگ بلے باز امام الحق کی جوڑی اہم سنگ میل کے قریب پہنچ گئی۔
گذشتہ روز کھیلے گئے میچ میں دونوں بیٹرز کے درمیان دوسری وکٹ پر 100 رنز کی شراکت داری قائم ہوئی، دونوں بیٹرز 2021ء سے اب تک 8 مواقعوں پر 100 رنز سے زائد کی شراکت داری کرچکے ہیں۔
امام الحق اور بابراعظم کو ماضی کے لیجنڈز بیٹرز محمد یوسف اور یونس خان کی جوڑی کا ریکارڈ توڑنے کے لئے صرف ایک سینچری درکار ہے۔
اس سے قبل یونس خان اور محمد یوسف کی جوڑی نو بار سینچری شراکت داری کرچکے ہیں۔
اس تاریخی شراکت داری کے دوران بابر اعظم اور امام الحق نے انفرادی طور پر مسلسل چھ ففٹی پلس اننگز سکور کیں، محمد یوسف نے بھی لگاتار 6 نصف سنچریاں بنائی ہیں جبکہ جاوید میانداد 9 نصف سینچریوں کے ساتھ سرفہرست ہیں۔
کرکٹ مبصرین بابر اور امام کی جوڑی کو پاکستان بیٹنگ لائن کا ستون قرار دے چکے ہیں۔
امام اور بابر اعظم اس وقت 27 اننگز کے دوران 80.80 کی ایوریج سے 2101 رنز بنا چکے ہیں۔ ان 27 اننگز میں 8 سنچریاں اور 10 نصف سنچریاں شامل ہیں۔