جوز بٹلرکو انگلینڈ ون ڈے کرکٹ ٹیم کا کپتان بنادیا گیا

لندن:(ویب ڈیسک) ایوئن مورگن کے ریٹائرمنٹ کے اعلان کے بعد جوز بٹلر کو انگلش کرکٹ ٹیم کی ون ڈے ٹیم کا کپتان بنادیا گیا ہے۔ کرکٹ کی دنیا کی معروف ویب سائٹ کرک انفو نے سماجی رابطے کی ویب سائٹ ٹوئٹر پر جوز بٹلر کے انگلینڈ کی وائٹ بال کرکٹ ٹیم کے نئے قائد مقرر ہونے کی خبر شیئر کی۔ گزشتہ دنوں اس حوالے سے ایوئن مورگن نے کہا کہ کافی غور اور مشاورت کے بعد میں نے فوری طور پر ریٹائر ہونے کا فیصلہ کیا ہے۔ خیال رہے کہ 35 سالہ مورگن نے 16 ٹیسٹ، 248 ون ڈے اور 115 ٹی 20 انٹرنیشنل میچ کھیلے ہیں جبکہ وہ ڈومیسٹک کرکٹ اور انٹرنیشنل کمنٹری سے وابستہ رہیں گے۔ گزشتہ روز انگلینڈ کے آل راؤنڈر معین علی نے برطانوی خبر رساں ادارے کے ٹیسٹ میچ سپیشل کو بتایا تھا کہ کپتان یہ محسوس کرتے ہیں کہ انہوں نے کافی بین الاقوامی کرکٹ کھیل لی ہے، ان کے لئے ٹیم اب بھی سرفہرست ہے جو کہ یہ ثابت کرتی ہے کہ وہ کس حد تک اپنی ٹیم کے ساتھ مخلص ہیں، یقینی طور پر انہوں نے بہت عمدہ کام کیا اور وہ سب سے بہتر تھے۔ دریں اثنا رپورٹس میں یہ بھی کہا گیا ہے کہ مورگن کے نائب جوز بٹلر وائٹ بال کرکٹ میں کے اگلے کپتان ہوں گے۔ خیال رہے کہ مورگن کو 2014 میں کپتان مقرر کیا گیا تھا اور انہوں نے انگلینڈ کی وائٹ بال کرکٹ میں اہم کردار ادا کیا ہے، بائیں ہاتھ کے بلے باز نے انگلینڈ کو 2019 میں اپنا پہلا ورلڈ کپ ٹائٹل بھی جتوایا۔