ضمنی الیکشن، نون لیگ کا آج جھنگ میں پاور شو، مریم نواز ریلی کی قیادت کریں گی

لاہور: (ویب ڈیسک) جھنگ میں ضمنی الیکشن کی تیاریوں کے سلسلے میں آج نون لیگ پاور شو کرے گی، نائب صدر مریم نواز ریلی کی قیادت کریں گی۔
ضمنی الیکشن میں میدان مارنے کا مشن، نون لیگ کا آج جھنگ میں جلسہ ہو گا۔ مریم نواز ریلی کی قیادت کے دوران گوجرہ اور چنیوٹ موڑ پر خطاب کریں گی۔ گذشتہ روز حلقہ پی پی 202 چیچہ وطنی میں انتخابی جلسے سے خطاب کرتے ہوئے پاکستان مسلم لیگ ن کی نائب صدر کا کہنا تھا کہ چیچہ وطنی کا جذبہ بتا رہا ہے کہ 17کو شیر آرہا ہے۔ چیچہ وطنی 17 جولائی کو فیصلہ سنائے گا کہ ایک مرتبہ پھر یہ شہر شیرکے ساتھ ہے۔
انہوں نے کہا کہ پٹرول اور ڈیزل کی قیمتیں عمران خان کی وجہ سے بڑھانی پڑیں، جتنے مشکل فیصلے ہونے والے تھے وہ ہو گئے، شہباز شریف عوام کے لئے بہت بڑے ریلیف کا اعلان کرنے والے ہیں۔ عالمی مارکیٹ میں پٹرول کی قیمتیں کم ہوتے ہی وزیراعظم عوام کو ریلیف دینگے، عمران خان کی صورت میں جو بلا آئی تھی وہ ٹل گئی ہے، ہاں ہم آلو پیاز کے ریٹ پتہ کرنے آئے ہیں۔
انہوں نے مزید کہا کہ آئے روز میڈیا پر عمران خان کے کارنامے کھلتے ہیں، پنجاب میں آکر ڈیڑھ گھنٹہ ہمارا سر کھاتا ہے، عمران خان چار سال میں کوئی چار کام بھی نہیں کر سکے، ہم عوام کی مشکلات کو ختم کر دیں گے۔