روم: (ویب ڈیسک) تعلیم حاصل کرنے کی کوئی عمر نہیں ہوتی اور انسان جب تک اس دنیا میں موجود ہے اسے علم کا حصول جاری رکھنا چاہیے ،اس مثال کو اٹلی کے شہری نےسچ ثابت کردیا ہے۔
غیر ملکی خبررساں ایجنسی کے مطابق اٹلی کے شہری نے 98 سال کی عمر میں دوسری بار گریجویشن مکمل کر کے سب کو حیران کر دیا۔
اطلاعات کے مطابق اٹلی کے 98 سالہ شہری گیوسیپی پیٹرنو( Giuseppe Paterno) ایک بار پھر اٹلی کے معمر ترین گریجویٹ بن گئے۔
پیٹرنو نے گزشتہ دنوں یونیورسٹی آف پالرمو سے تاریخ اور فلسفے میں ماسٹرز مکمل کیا اور انہیں ایک تقریب میں ڈگری دی گئی ۔واضح رہے کہ 2 سال قبل بھی انہوں نے انہی مضامین میں ابتدائی ڈگری حاصل کی تھی۔
خاندانی ذرائع کا کہنا ہے کہ پیٹرنو نے ایک بار پھر اعلیٰ نمبروں کے ساتھ ڈگری حاصل کی۔
1923 میں پیدا ہونے والے پیٹرنو ایک غریب گھرانے میں پلے بڑھے،کتابوں اور مطالعے سے محبت کے باوجود وہ نوجوانی میں یونیورسٹی نہیں جا سکے تھے۔
رپورٹس کے مطابق پیٹرنو نے 20 سال کی عمر میں دوسری جنگ عظیم کے دوران اٹلی کی بحریہ میں خدمات انجام دیں اور پھربعدا ازاں ریلوے میں بھی ملازمت کی۔
رپورٹس کے مطابق ماسٹرز ڈگری حاصل کرنے کے بعد بھی پیٹرنو کا آرام کرنے کا کوئی ارادہ نہیں ہے اور وہ اپنے ٹائپ رائٹر کا استعمال کرتے ہوئے ایک ناول لکھنا چاہتےہیں۔
اٹلی کے شہری نے 98 سال کی عمر میں دوسری بار گریجویشن مکمل کرلی
