ہالی وڈ اسٹار سلویسٹر اسٹیلون کی اہلیہ شوہر سے علیحدگی کیلئے عدالت پہنچ گئیں

فلوریڈا : (ویب ڈیسک) جینیفر فلاون نے انسٹاگرام سے اپنے شوہر سلویسٹر اسٹیلون کو ان فالو بھی کر دیا ہے۔
اس حوالے سے سلویسٹر اسٹیلون کا کہنا تھا کہ میں اپنے خاندان سے بہت محبت کرتا ہوں اور ہم یہ معاملہ دوستانہ اور نجی طریقے سے حل کرنے کی کوشش کر رہے ہیں۔
جینیفر فلاون نے علیحدگی کیلئے جمعے کے روز فلوریڈا کی پام بیچ کاؤنٹی کی عدالت سے رجوع کیا تھا جہاں انہوں نے موقف اختیار کیا کہ ان کے شوہر اسٹیلون ازدواجی اثاثے (Marital Assets) چھپا رہے ہیں۔
انہوں نے موقف اختیار کیا کہ ان کے درمیان شادی کا تعلق اب ٹوٹ چکا ہے اور بات ناقابل واپسی حد تک پہنچ چکی ہے۔رواں ہفتے سلویسٹر اسٹیلون نے اپنے ترجمان کے ذریعے بیان جاری کروایا تھا کہ وہ اپنی اہلیہ کے ٹیٹو کو اپڈیٹ کروانا چاہ رہے تھے لیکن اس میں خرابی ہو گئی تھی جسے دور کرنا ممکن نہیں رہا تھا جس کی وجہ سے مجبوراً انہیں اپنی اہلیہ کے ٹیٹو کو اپنے کتے کے ٹیٹو سے چھپانا پڑ گیا۔
رواں برس اپنی شادی کی 25 ویں سالگرہ کے موقعے پر سلویسٹر اسٹیلون نے اپنی اہلیہ کیلئے محبت بھرے پیغام میں لکھا تھا کہ میرے پاس وہ الفاظ نہیں جس سے میں اس بے لوث، ڈیڈیکیٹڈ اور صابر خاتون کی ہماری زندگی میں اہمیت بیان کر سکوں، میں بس یہ خواہش کرتا ہوں کہ میں اگلے 25 سال بھی اس کے ساتھ ایسے ہی گزار دوں، شادی کی 25 ویں سالگرہ مبارک ہو۔ اس کے جواب میں جینیفر نے لکھا کہ مجھے ہمیشہ ہنسانے، پیار کرنے اور ہمارے خوبصورت خاندان کی حفاظت کرنے کیلئے تمہارا شکریہ۔
انہوں نے لکھا کہ ہماری شادی ہر گزرتے سال کے ساتھ اور نکھرتی جا رہی ہے، میں اپنی پوری زندگی ساتھ گزارنے کیلئے اور صبر نہیں کر سکتی۔