پنجاب میں سموگ کے خاتمے کیلئے ماحولیاتی خلاف ورزیوں پر کریک ڈائون جاری

لاہور (این این آئی) وزیراعلیٰ پنجاب کی ہدایت پر لاہور میں سموگ گنز کے ذریعے پانی کا چھڑکائو جاری ہے جبکہ صوبے بھر میں فضائی آلودگی کا باعث بننے والے صنعتی یونٹس، اینٹوں کے بھٹوں، غیر معیاری پلاسٹک اور دھواں چھوڑنے والے دیگرذرائع کے خلاف فیلڈ انفورسمنٹ مزید موثر بنا دی گئی ہے۔ سینئر صوبائی وزیر مریم اورنگزیب کے مطابق میٹریل لے جانے والی ٹرالیوں کو کور کرنے کے ایس او پیز پر سختی سے عملدرآمد کرایا جا رہا ہے۔ ماحولیاتی قوانین کی خلاف ورزی کسی صورت برداشت نہیں کی جائے گی جبکہ ڈرون سکواڈ، نائٹ سکواڈ اور ہاک آئی فیلڈ سکواڈ کے ذریعے مسلسل نگرانی جاری ہے۔گزشتہ 24 گھنٹوں کے دوران پنجاب بھر میں 265 صنعتی یونٹس کی انسپکشن کی گئی، جس کے نتیجے میں 2 یونٹس سیل اور 11 لاکھ روپے جرمانہ عائد کیا گیا۔ اینٹوں کے بھٹوں کے خلاف کارروائیوں کے دوران 403 بھٹوں کی جانچ پڑتال کی گئی، 5 بھٹے سیل، 8 مقدمات درج اور 14 لاکھ روپے جرمانہ عائد کیا گیا۔ غیر معیاری پلاسٹک کے خلاف کارروائیوں میں 213 مقامات کی انسپکشن کی گئی، 6 مقامات سیل، 265 کلو گرام پلاسٹک ضبط اور 84 ہزار روپے جرمانہ عائد کیا گیا۔ باربی کیو اور کمرشل کوکنگ پوائنٹس پر دھوئیں کی روک تھام کے لیے بھی کارروائیاں جاری ہیں۔ گزشتہ 24 گھنٹوں میں 115 مقامات کی چیکنگ کی گئی، 8 مقامات سیل کیے گئے جبکہ 77 مقامات پر سکشن ہڈز نصب کرائے گئے تاکہ دھوئیں کے اخراج کو کم کیا جا سکے۔ حکومت کی جانب سے کسانوں کو فصلوں کی باقیات جلانے سے روکنے کے لیے آگاہی مہم بھی جاری ہے۔ گزشتہ 24 گھنٹوں کے دوران 1,987 کسانوں سے رابطہ کیا گیا، جس کے بعد رابطہ کیے جانے والے کسانوں کی مجموعی تعداد 307,984 ہوگئی۔ پنجاب بھر میں فصلوں میں آگ لگنے کے 8 مقامات پر آگ بجھانے کی کارروائی بھی کی گئی۔ سینئر صوبائی وزیر مریم اورنگزیب نے شہریوں سے اپیل کی ہے کہ وہ دھواں چھوڑنے والے ذرائع کی نشاندہی کریں اور ماحولیاتی قوانین پر عملدرآمد یقینی بنانے میں حکومت کا ساتھ دیں۔ ان کا کہنا تھا کہ صاف فضا کے ہدف کے حصول کے لیے حکومت اور عوام کا مشترکہ تعاون ناگزیر ہے۔