لاہور میں سموگ کا راج، دنیا کے آلودہ ترین شہروں میں پہلے نمبرپر آ گیا

لاہور (این این آئی) لاہور میں فضائی آلودگی نے خطرے کی گھنٹی بجا دی، شہر کا مجموعی ایئر کوالٹی انڈیکس 253 ریکارڈ کیا گیا، جس کے بعد لاہور دنیاکے آلودہ ترین شہروں کی فہرست میں پہلے نمبر پر آگیا۔ آلودگی کے اعتبار سے برکی روڈ اور اطراف کے علاقے 520 اے کیو آئی کے ساتھ سرفہرست رہے، گلبرگ میں 457 اور گورنمنٹ کالج یونیورسٹی کے اطراف میں 392 اے کیو آئی ریکارڈ کیا گیا۔ سمن آباد میں 363، ڈیفنس میں 332، ماڈل ٹائون میں 324، اقبال ٹائون میں 304 جبکہ اچھرہ اور اطراف کے علاقوں میں اے کیو آئی 281 ریکارڈ کیا گیا۔ عالمی ایئر مانیٹرز کے مطابق لاہور میں شمال مغربی سمت سے 8 کلو میٹر فی گھنٹہ کی رفتار سے ہوا چل رہی ہے، طبی ماہرین نے شہریوں کو غیرضروری طور پر گھروں سے باہر نکلنے سے گریز، ماسک کے استعمال اور گھروں و دفاترکی کھڑکیاں بند رکھنے کی ہدایت کی ہے تاکہ فضائی آلودگی کے مضر اثرات سے محفوظ رہا جاسکے۔