یونان: (ویب ڈیسک) یونان کے قریب خراب موسم اور طوفانی ہواؤں کے سبب مہاجرین کی دو کشتیاں الٹنے سے 16 خواتین سمیت18افراد ہلاک ہوگئے ہیں حادثے کے دوران دیگر لاپتہ افراد کی تلاش جاری ہے۔
بین الاقوامی میڈیا کے مطابق یونان میں سمندری طوفان کا شکار ہونے والی کشتی پر 40 افراد سوار تھےجن میں سے 9 کو بچالیا گیا ہے جبکہ دیگر 15 کی تلاش کیلئے ریسکیو آپریشن جاری ہے۔
یونانی حکام کا دعویٰ ہے کہ خراب موسم اور سمندری ہواؤں سے تباہ ہونے والی کشتی پر سوار تمام مسافر خواتین تھیں۔
دوسری جانب مہاجرین پر مشتمل ماہی گیروں کی ایک اور کشتی طوفانی ہواؤں کے باعث سمندری چٹان سے ٹکرانے کے بعد تباہ ہوگئی،کشتی پر 95 افراد سوار تھے۔
ریسکیو کے مطابق حادثہ کا شکار ہونے والی کشتی میں سوار 80افراد کو بچالیا گیا ہے،حادثہ میں 2افراد ہلاک ہوئے جبکہ دیگر کی تلاش جاری ہے ۔
کوسٹ گارڈ کے مطابق کشتی میں سوار افراد نے تباہ شدہ کشتی کے ملبے پر سوار ہوکر جان بچانے کی کوشش کی، اس دوران سمندری چٹان پر چڑھ کرلوگوں نے اپنی جان بچائی،حادثہ کا شکار افراد کیلئے قریبی علاقے میں قائم اسکول میں ریلیف کیمپ قائم کردیا گیا ہے۔
عراق، شام اور افغانستان سمیت دنیا بھر سے غربت کے ستائے افراد کی یورپ کی طرف نقل مکانی جا ری ہے،2015سے اب تک ہزاروں افراد یونان کے راستے یورپ میں داخل ہونے کی کوشش میں زندگی کی بازی ہار چکے ہیں۔
یونان کے قریب مہاجرین کی کشتی الٹنے سے 16 خواتین سمیت 18 افراد ہلاک
