لاہور: (ویب ڈیسک) انتظار کی گھڑیاں ختم ہو گئیں، عالمی وباء کورونا وائرس سمیت متعدد وجوہات کی وجہ سے مسلسل تاخیر کا شکار ہونے والی فلم “ٹچ بٹن” کا ٹریلر جاری کر دیا گیا ہے جبکہ فلم کو آئندہ ماہ سینما گھروں کی زینت بنانے کا بھی اعلان کیا گیا ہے۔
معروف گلوکار و اداکار فرحان سعید اور فیروز خان کی فلم “ٹچ بٹن” کی شوٹنگ 2018 میں شروع کی گئی تھی اور اسے 2019 کے اختتام تک ریلیز کیے جانے کا امکان تھا تاہم کورونا کی وجہ سے ایسا نہ ہو سکا۔
طویل انتظار کے بعد اب فلم کا پہلا ٹریلر جاری کرتے ہوئے اسے آئندہ ماہ 11 نومبر کو پاکستان سمیت دنیا بھر میں نمائش کیلئے پیش کرنے کی تصدیق کردی گئی ہے۔
مختصر دورانیے کے جاری کیے گئے ٹریلر سے معلوم ہوتا ہے کہ فلم کی کہانی رومینٹک کامیڈی ہے اور اس کی شوٹنگ پاکستان کے علاوہ ترکیہ میں بھی کی گئی ہے۔
جاری کیے گئے ٹریلر سے اندازہ ہوتا ہے کہ فلم کے مرکزی کردار یعنی فیروز خان اور فرحان سعید بھائی کے طور پر دکھائی دیں گے جن کے درمیان ممکنہ طور پر اس وقت غلط فہمیاں پیدا ہوجاتی ہیں جب وہ ایک دوسری کی محبوبائوں سے عشق کر لیتے ہیں۔
فلم میں خوبرو اداکارہ سونیا حسین اور ایمان علی نے فرحان سعید اور فیروز خان کے مخالف کردار ادا کیے ہیں، ٹچ بٹن میں سینیئر کامیڈین اور اداکار سہیل احمد بھی مرکزی کردار میں دکھائی دیں گے۔
انتظار ختم، ‘ٹچ بٹن’ کا ٹریلر ریلیز، آئندہ ماہ نمائش کیلئے پیش کرنے کا اعلان
