لاہور: (ویب ڈیسک) گزشتہ روز آئی سی سی مینز ٹی ٹوئنٹی ورلڈکپ کے سپر 12 مرحلے کے اہم میچ میں سنسنی خیز مقابلے میں بھارت کے ہاتھوں شکست کے بعد بنگلادیش نے بھارتی کرکٹر ویرات کوہلی پر فیک فیلڈنگ کا الزام لگا دیا۔ بھارت کے ہاتھوں 5 رنزسے شکست کے بعد بنگلادیش کے وکٹ کیپر بیٹر نورالحسن نے دعویٰ کیا ہے کہ میچ کے دوران آن فیلڈ امپائرز نے ویرات کوہلی کی جانب سے فیک فیلڈنگ کرنے کو نہیں دیکھا۔ جس فیک فیلڈنگ کی بات ہورہی ہے اصل میں وہ بنگلادیش کی اننگز کے 7 ویں اوور میں دیکھی گئی۔ہوا کچھ یوں کے اکسر پٹیل کی گیند پر بنگلادیشی بیٹر لٹن داس نے ڈیپ آف سائیڈ فیلڈ کی جانب شاٹ کھیلا اور گیند وہاں موجود فیلڈر ارشدیپ سنگھ کے پاس گئی، ارشدیپ نے جیسے ہی تھرو وکٹ کیپر کی جانب پھینکی تو پوائنٹ پوزیشن پر موجود کوہلی نے ایسا ظاہر کیا کہ گیند ان کے پاس آئی اور انہوں نے خالی ہی ہاتھوں سے بولنگ اینڈ کی جانب فیک تھرو کی۔
