ماسکو: (ویب ڈیسک) روس کے شہر کوستروما میں ایک نائٹ کلب میں اچانک آگ بھڑک اُٹھی جس کے نتیجے میں 15 افراد جل کر ہلاک ہوگئے۔
عالمی خبر رساں ادارے کے مطابق روس کے نائٹ کلب میں آگ اس وقت بھڑکی جب وہاں 250 سے زائد افراد رقص و سرور کی محفل میں شریک تھے۔ آتشزدگی کے باعث وہاں بھگدڑ مچ گئی۔
جس عمارت میں آگ لگی وہاں نائٹ کلب کے علاوہ بار ہاؤس اور کیفے بھی تھا۔ نائٹ کلب میں آگ لگنے سے 15 افراد ہلاک اور درجن سے زائد زخمی ہوگئے۔ ہلاک اور زخمی ہونے والوں کو قریبی اسپتال منتقل کردیا گیا۔
فائر بریگیڈ کے عملے نے ایک گھنٹے میں آگ پر قابو پالیا تاہم اس دوران نائٹ کلب کی چھت گر گئی اور عمارت کو شدید نقصان پہنچا۔ عمارت سے 200 سے زائد افراد کو بحفاظت نکال لیا گیا تھا۔
پولیس کا کہنا ہے کہ آگ لگنے کا واقعہ نائٹ کلب میں موجود ایک شخص کی طرف سے آتش بازی کرنے کے باعث ہوا جسے گرفتار کرلیا گیا۔ ملزم سے تفتیش جاری ہے جس کی بنیاد پر مقدمہ درج کیا جائے گا۔
روس؛ نائٹ کلب میں خوفناک آتشزدگی میں 15 افراد ہلاک
