زرعی صنعتی کیلئے بجلی کی اضافی کھپت پر ریلیف مزید کم کرنیکا فیصلہ

ملتان(کامرس رپورٹر) صنعتی اور زرعی صارفین کیلئے بجلی کی اضافی کھپت پر ریلیف مزید کم کرنے کا فیصلہ کرلیا گیا۔ نیپرا نے رعایتی پیکیج کے تحت فی یونٹ نرخ میں 2 روپے 32 پیسے اضافے کی منظوری دے دی۔نیپرا نے نوٹیفکیشن کیلئے فیصلہ وفاقی حکومت کو بھجوا دیا۔ اضافی کھپت پر بجلی کا ریٹ 22 روپے 98 پیسے سے بڑھ کر 25 روپے 23 پیسے فی یونٹ ہو جائے گا۔ نیا نرخ نومبر کے بلنگ مہینے سے لاگو کرنے کی تجویز ہے۔وفاقی حکومت اس وقت صنعتی اور زرعی صارفین کو اضافی بجلی کے استعمال پر فی یونٹ 11 سے 15 روپے تک ریلیف دے رہی ہے۔نیپرا کا یہ فیصلہ چیئرمین کے کاسٹنگ ووٹ سے منظور ہوا۔ دو ارکان آمنہ احمد اور مقصود انور خان نے اختلافی نوٹ تحریر کیا۔ اختلافی نوٹ میں 25 روپے 23 پیسے فی یونٹ کے مجوزہ نرخ کو بے بنیاد قرار دیا گیا۔دوسری جانب ترجمان پاور ڈویڑن کے مطابق حکومت نے صنعتی اور زرعی صارفین کے بجلی ٹیرف میں تبدیلی نہیں کی، بجلی کی قیمت میں معمولی اضافہ صرف اضافی کھپت پر تجویز کیا گیا ہے۔ترجمان کے مطابق انکریمنٹل پیکیج سے ستمبر 2026 تک 2 لاکھ 9 ہزار 335 صنعتی و زرعی صارفین مستفید ہوئے، 5 لاکھ 18 ہزار 316 اہل صارفین میں سے تقریباً 40 فیصد نے پیکیج سے فائدہ اٹھایا۔ دسمبر 2025 سے ستمبر 2026 تک 6 ہزار 940 گیگا واٹ آور اضافی بجلی استعمال کی گئی۔اعلامیے کے مطابق اضافی بجلی کے استعمال پر صنعتی و زرعی صارفین کو 43 ارب 50 کروڑ روپے کا ریلیف دیا گیا، صنعتی صارفین کو اضافی بجلی کے استعمال پر 5 سے 10 روپے فی یونٹ تک ریلیف ملا، پیکیج سے مجموعی بجلی بلوں میں اوسطاً 1 روپے 50 پیسے سے 2 روپے 50 پیسے فی یونٹ کمی ہوئی۔ترجمان کے مطابق علاقائی کشیدگی کے باعث صرف اضافی بجلی کی کھپت پر معمولی اضافہ تجویز کیا گیا، عالمی مارکیٹ میں فیول مہنگا ہونے سے بجلی کی پیداواری لاگت میں اضافہ ہوا، حکومت کا مقصد دیگر صارفین پر بجلی کے اضافی بوجھ کو روکنا ہے۔
بجلی مہنگی