اسحاق ڈار کا لیاقت بلوچ سے ٹیلی فونک رابطہ، 10نومبر کو مذاکرات کا آخری دور ہوگا

لاہور( این این آئی)نائب وزیراعظم اسحاق ڈار نے نائب امیر جماعت اسلامی لیاقت بلوچ
سے ٹیلیفون پر رابطہ کیا، دونوں رہنمائوں نے حکومت اور جماعت اسلامی کے درمیان مذاکرات کے حوالے سے تفصیلی گفتگو کی۔نجی ٹی وی نے لیاقت بلوچ کے حوالے سے کہا کہ حکومت اور جماعت اسلامی کی مذاکراتی سب کمیٹی کا اجلاس ہو چکا ہے جبکہ ٹیکنیکل کمیٹی بھی اپنا اجلاس مکمل کر چکی ہے، اب حکومت کی جانب سے پیٹرولیم لیوی اور عوامی ریلیف کے لیے اقدامات کا مرحلہ ہے۔لیاقت بلوچ نے بتایا کہ 10 نومبر کو حکومت اور جماعت اسلامی کی سب کمیٹی کے مذاکرات کا آخری رائونڈ ہوگا ، اجلاس نائب وزیراعظم اسحاق ڈار کی میزبانی میں وزارت خارجہ کی عمارت میں منعقد ہوگا۔دوسری جانب اسحاق ڈار نے کہا ہے کہ جماعت اسلامی کا احتجاج پرامن اور جمہوری دائرے میں ہے، احتجاج کے نتیجے میں عوامی ریلیف کے حوالے سے متعدد اہداف حاصل کیے جا چکے ہیں، جبکہ پیٹرولیم لیوی کا معاملہ بھی حل کرنے کے لیے زیر غور ہے۔